ShQO mektepterinde órt qaýipsizdigi talaptaryn buzýdyń 1 543 faktisi anyqtaldy

ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar mektepterdiń jańa oqý jylyna daıyndyǵyn tekserdi. Oblys boıynsha 653 bilim berý nysany bar. Onyń ishinde 343-i – jalpy bilim beretin mektep. 

«Oqý jylyna daıyndyq aıasynda órt qaýipsizdigi erejeleriniń saqtalýyna tekserý júrgizildi. Ǵımarattarǵa kireberis joldarǵa, órtke qarsy sýmen qamtamasyz etý júıesine, órt avtomatıkasy men evakýatsııa joldarynyń jaı-kúıine, elektr jabdyqtarynyń jaramdylyǵyna, órt sóndirýdiń alǵashqy quraldarymen qamtamasyz etilýine basa nazar aýdaryldy. Sonyń nátıjesinde órt qaýipsizdigi talaptaryn buzýdyń 1 543 faktisi anyqtaldy», - delingen aqparatta. 

Bilim ordalaryna órtke qarsy daıyndyqtyń qanaǵattanarlyqsyz jaǵdaıda ekendigi týraly habarlandy. Qazirgi ýaqytta buzýshylyqtar tolyqtaı joıylǵan. TJD mamandary jyl kóleminde qaýipsiz evakýatsııalaý boıynsha barlyǵy 168 birlesken jattyǵý ótkizgen.