ShQO mektepterinde órt qaýipsizdigi erejelerin buzýdyń 1600-den astam faktisi anyqtaldy

ÓSKEMEN. KAZINFORM –  Shyǵys Qazaqstan oblysyndaǵy bilim ordalaryna órt qaýipsizdigi erejeleriniń saqtalý-saqtalmaýyna qatysty tekserý júrgizildi.

Óńir boıynsha ShQO Tótenshe jaǵdaılar departamentiniń esebine 667 bilim berý nysany alynǵan. Olardyń qataryna jalpy bilim beretin mektepter, balabaqshalar, ınternattar, kásibı lıtseıler, tehnıkalyq mektepter men kolledjder bar. Qutqarýshylar 300 mekemege profılaktıkalyq baqylaý júrgizip, sonyń nátıjesinde 1600-den astam zańbuzýshylyq tirkeldi.

- Zańbuzýshylyqtar kóbinese qujattamany durys júrgizbeýge, ártúrli qurylystardy órtten qorǵaý maqsatynda júrgiziletin óńdeýlerdiń talapqa saı bolmaýyna, elektr jelileri men elektr jabdyqtary jaǵdaılarynyń talapqa sáıkes kelmeýine qatysty boldy. Sondaı-aq janǵysh materıaldardy saqtaý, órt sóndirý quraldarynyń isten shyǵýy sııaqty buzýshylyqtar da kezdesedi, - dep habarlady departamenttiń baspasóz qyzmetinen.

TJD qyzmetkerleri mektep basshylyǵyna ákimshilik is qozǵamaı, olardy joıý týraly belgilengen merzimder kórsetilgen nusqama shyǵardy.

Eger anyqtalǵan buzýshylyqtar tıisti merzim ishinde joıylmasa, onda QR ÁQBtK-niń 462-baby 3-bóligine sáıkes ákimshilik is qozǵalady.

Eske salsaq, osyǵan deıin SQO-da ata-analarǵa mektep formasyna qoıylatyn talaptar eske salyndy.