ShQO mektepterinde oqýshylar qaı kezden bastap jańa mázirmen tamaqtanady — basqarma jaýaby
ÓSKEMEN. KAZINFORM — Shyǵys Qazaqstan oblysyndaǵy mektepterde oqýshylar qashannan bastap jańa mázirmen tamaqtanatyndyǵy týraly saýalǵa Bilim basqarmasynan jaýap berdi.
El óńirleriniń mektepterinde jańa standart boıynsha as máziri áldeqashan engizilse, Shyǵys Qazaqstanda jaǵdaı áli ózgerissiz. Sonyń saldarynan kásipkerler shyǵynǵa batyp jatyr. Bul másele taıaýda Qazaqstan kásipkerleriniń quqyqtaryn qorǵaý jónindegi ýákil Qanat Nurovtyń ShQO jáne Abaı oblysy kásipkerlerimen ótken kezdesýinde talqyǵa salynǵan bolatyn. Sonyń barysynda bıznes ókilderi óńirdegi erekshelikter men maýsymdyq ónimderdi eskerý úshin ózara almastyrylatyn azyq-túlik tizimin keńeıtýdi usyndy.
Kazinform tilshisi bilim ordalaryndaǵy oqýshylar qaı kezden bastap jańa mázirmen tamaqtanatyndyǵy týraly saýaldy ShQO Bilim basqarmasyna joldap kórdi.
— Mázirdi bekitý — Densaýlyq saqtaý mınıstrliginiń quzyretinde. Óıtkeni mekteptegi as mázirin jańartý men tamaqtaný standarttaryn ózgertý sanıtarııalyq normalar men tamaq ónimderiniń qaýipsizdigi talaptaryna sáıkes júrgiziledi. Qazaqstan Respýblıkasy Densaýlyq saqtaý mınıstrligimen 2020 jylǵy 21 jeltoqsandaǵy № QR DSM-302/2020 buıryǵymen bekitilgen mázir bar. Ol mázirden mektepterdegi tamaqtanýdy uıymdastyrýshy kompanııalar bas tartqandyqtan, mázirge ózgeris engizý týraly usynys hat Densaýlyq saqtaý mınıstrligine jiberilip, jaýap alyndy. Qazirgi ýaqytta densaýlyq saqtaý basqarmasymen ózgertilgen mázirdi bekitý boıynsha jumystar júrgizilip jatyr. Barlyq ózgeris bekitilgennen keıin jańartylǵan mázir mektep ashanalaryna engiziletin bolady, — dep jaýap berdi basqarmanyń baspasóz qyzmetinen.
Eske salsaq, osyǵan deıin balalardyń áleýmettik jelige tirkelýin jasyna qaraı shekteý usynylǵany habarlanǵan.