ShQO mektepterinde oqýshylar áli kúnge deıin eski mázir boıynsha tamaqtanady

ÓSKEMEN. KAZINFORM — El óńirleriniń mektepterinde jańa standart boıynsha as máziri áldeqashan engizilse, Shyǵys Qazaqstanda jaǵdaı áli ózgerissiz. Sonyń saldarynan kásipkerler shyǵynǵa batyp jatyr. 

Mekteptegi tamaqtaný máselesi Qazaqstan kásipkerleriniń quqyqtaryn qorǵaý jónindegi ýákil Qanat Nurovtyń ShQO jáne Abaı oblysy kásipkerlerimen ótken kezdesýinde talqyǵa salyndy.

— Densaýlyq saqtaý mınıstrligi bekitken mázir óńirlerdegi erekshelikter men naryqtaǵy naqty baǵalardy eskermeıdi. Bir balaǵa bólinetin 722 teńge jetkiliksiz. Al mázirine engizilgen keıbir taǵamdardy balalar jegisi kelmeıdi. Sonyń saldarynan kásipkerler tabys tappaı, kerisinshe shyǵynǵa batady, — dedi Bólshek saýda jáne qoǵamdyq tamaqtaný qaýymdastyǵynyń tóraǵasy Marına Lapteva.

Onyń aıtýynsha, Shyǵys Qazaqstanda jańa mázir áli bekitilmegen. Al ózge óńirlerde jańa normalar engizilip, olardyń tıimdiligi baǵalanyp jatyr. Kezdesýge qatysýshylar másele qyrkúıekten beri talqylanyp kele jatqanyn, biraq áli naqty sheshim joqtyǵyn jetkizdi.

Bıznes ókilderi óńirdegi erekshelikter men maýsymdyq ónimderdi eskerý úshin ózara almastyrylatyn azyq-túlik tizimin keńeıtýdi usyndy.

Bıznes-ombýdsmen Qanat Nurov bul másele qaǵaz júzinde emes, naqty ispen sheshilýi qajettigin aıtty.

— Kásipkerdiń damýyna jaǵdaı jasaý — basty mindetimiz. Ol bıýrokratııamen emes, ispen aınalysýy kerek. Kóterilgen barlyq suraq qaralyp, árqaısysy boıynsha naqty sheshim qabyldanady, — dedi ol.

Eske salsaq, osyǵan deıin Elordalyq mektepte oqýshylardyń qaýipsizdigi men tártibin jasandy ıntellekt baqylaıtyny habarlanǵan.