ShQO mektepteriniń 58% oqý jylyn onlaın bastaıdy
ÓSKEMEN. QazAqparat – Shyǵys Qazaqstan oblysyndaǵy mektepterdiń 58 paıyzy jańa oqý jylyn onlaın rejımde bastaıdy. Bul týraly áleýmettik jelidegi tikeleı efır barysynda aımaq basshysy Danıal Ahmetov málimdedi, dep habarlaıdy QazAqparat tilshisi.
«2020-2021 oqý jylynyń birinshi toqsanynda 312 mekteptegi 109,6 myń oqýshy (58%) qashyqtan bilim alady. Ata-analardyń ótinishteri boıynsha bastaýysh synyp oqýshylary kezekshi synyptarda oqı alady. Ár topta 15 adam bolady. Barlyq sanıtarlyq sharalar qatań saqtalady. Sondaı-aq bıyl qashyqtan oqytý júıesiniń rejımin túsindirý maqsatynda balalardyń biryńǵaı saǵaty jáne ata-analardyń biryńǵaı dárisi uıymdastyrylmaq», - dedi ol.
ShQO ákiminiń aıtýynsha, 334 mektepte oqýshylar buryndaǵydaı sabaqqa barady. Bul, shaǵyn jıyntyqty jáne oryn sany jetkiliksiz mektepterge qatysty.
«Atalǵan mektepterde bilim alatyn oqýshylar eki aýysymda oqıdy. Ár sabaqtan soń jarty saǵat boıy jeldetý jáne dezınfektsııalaý jumystary júrgiziledi. Sonymen qatar maska kııý rejımi men medıtsınalyq baqylaý kúsheıtiledi», - dedi Danıal Ahmetov.
Aıta keteıik, búginde oblystaǵy barlyq mektep dezınfektsııalyq jáne sanıtarlyq qaýipsizdik quraldarymen tolyqtaı qamtamasyz etilgen. Budan bólek, balalarǵa tegin maskalar beriletin bolady.
