ShQO mektepterinde 60-qa jýyq zańbuzýshylyq anyqtaldy
ÓSKEMEN. QazAqparat – Shyǵys Qazaqstan oblysyndaǵy mektepterde 58 zańbuzýshylyq anyqtalǵan, dep habarlaıdy QazAqparat tilshisi.
ShQO Bilim salasynda sapany qamtamasyz etý departamenti bilim sapasyn syrttaı baǵalaý bóliminiń basshysy Botagóz Raıymbekovanyń aıtýynsha, mektepterge profılaktıkalyq baqylaý júrgizý qandaı da bir zańsyzdyqtardy ýaqtyly anyqtaýǵa jáne onyń aldyn alýǵa baǵyttalǵan.
«Jyl saıyn árbir jartyjyldyqqa profılaktıkalyq baqylaý júrgizý úshin bilim berý uıymdarynyń tizimi bekitiledi. 2020 jyly Shyǵys Qazaqstanda bul tizimge 21 mektep kirdi. Osylaısha, baqylaý 19 oqý ornynda júrgizilip, qalǵan eki mektep karantınge baılanysty tekserilmedi. Sonyń nátıjesinde 16 bilim ordasynda buzýshylyqtar anyqtalǵan», - dedi ol.
Botagóz Raıymbekovanyń sózine sensek, shaǵyn ortalyqtar, balabaqshalar jáne mektepaldy daıarlyq synyptary jumys isteıtin bilim berý uıymdarynda birqatar kemshilikter bar. Bul Jarma aýdanynyń Jańǵyztóbe orta mektep-balabaqshasyna, Rıdderdegi «Shańyraq» kópsalaly mektep-gımnazııasyna, Semeı qalasynyń №23 jalpy orta bilim beretin mektebine, Semeı qalasynyń №12 jalpy orta bilim beretin mektebine, Óskemen qalasynyń №29 qosymsha bilim berý mektep-ortalyǵyna, Borodýlıha aýdanynyń Á.Bókeıhan atyndaǵy qazaq orta mektebine qatysty.
«2019-2020 jáne 2020-2021 oqý jyldaryna arnalǵan mektepke deıingi tárbıe men oqytýdyń josparyndaǵy pánderdiń ataýlary uıymdastyrylǵan oqý qyzmeti kestesindegi pánderdiń ataýlaryna sáıkes kelmeıdi. Sondaı-aq kesteler bekitilmegen, mektepaldy daıarlyq synyptaryndaǵy synyp jýrnaldary júrgizilmegen. Mektepke deıingi tárbıeshilerdiń laýazymdyq nusqaýlyqtary durys ázirlenbegen, al pedagogıkalyq keńesterde mektepke deıingi tárbıe men oqytý máseleleri qarastyrylmaǵan. Budan bólek, mektepke deıingi kabınetterde materıaldyq baza álsiz», - dedi bólim basshysy.
Jalpy profılaktıkalyq baqylaý aıasynda 16 mektepte 58 buzýshylyq anyqtalǵan.
