ShQO medıtsınalyq týrızm baǵytyn damytady

Shyǵys Qazaqstan oblysynyń ákimi Ermek Kósherbaev óńirdiń týrıstik áleýetin damytý sharalary týraly aıtyp berdi, dep habarlaıdy Kazinform agenttigi.

Ákimniń aıtýynsha, oblysta 320 medıtsınalyq mekeme bar, onda 8,3 myń adam jumys isteıdi, onyń ishinde 2,2 myń dáriger bar.

«Biz úshin densaýlyq saqtaýdy, medıtsınalyq týrızmdi damytý máseleleri birinshi kezektegi mindet bolyp otyr. Sonymen qatar, biz ortalyq memlekettik organdarmen birlesip sheshetin birqatar problemalyq máseleler bar. Birinshiden, Óskemen qalasyndaǵy gematologııa ortalyǵy jáne Rıdder qalasyndaǵy aýrýhana kesheni qurylysyn aıaqtaý úshin qarjylandyrý máselesi bar», - dedi E. Kósherbaev Ortalyq kommýnıkatsııalar qyzmetinde ótken baspasóz máslıhatynda.

Oblys ákimi aıtqan ekinshi másele – medıtsına uıymdarynyń kredıtorlyq bereshegin óteý. Bul búkil respýblıka boıynsha júıeli másele.

«Bizdiń josparymyzda medıtsınalyq týrızmdi damytý da bar. Qazirgi ýaqytta onkologııalyq jáne kardıologııalyq aýrýlardy dıagnostıkalaý jáne emdeý ortalyǵyn qurý jónindegi jobany iske asyryp jatyrmyz. Onyń basty aıyrmashylyǵy – joǵary tehnologııalyq jabdyqtarmen tekserý ǵana emes, sanatorıı jaǵdaıynda patsıentterdi odan ári ońaltý», - dep túsindirdi E. Kósherbaev.

Aıta keteıik, Ermek Kósherbaev elordada Shyǵys Qazaqstan oblysynyń áleýmettik-ekonomıkalyq damýy týraly esep berip jatyr.

Buǵan deıin óńir basshysy ShQO-nyń týrıstik áleýetin damytý sharalary týraly aıtyp bergen edi.