ShQO máslıhatynyń depýtaty gazetke latyn álipbıinde maqala jazyp kórdi

ASTANA. QazAqparat - Shyǵys Qazaqstan oblysy máslıhatynyń depýtaty latyn álipbıine kóshý bastamasyn qoldaý maqsatynda «Semeı tańy» gazetine latyn grafıkasynyń usynylyp otyrǵan nusqasynda maqala jazdy, dep habarlaıdy QazAqparat.

Aıta keteıik, ǵasyrlyq tarıhy bar búgingi «Semeı tańy» gazeti alǵash «Saryarqa», «Qazaq tili» bolyp jaryq kórgen tusta  tóte jazýmen, keıin ataýy «Jańa aýyl», «Qyzyl dala», «Sotsıaldy Shyǵys» bolyp ózgergen basylym latyn grafıkasymen shyǵyp turǵan. Sondyqtan «Semeı tańy» gazetinde jaryq kórgen maqala «SEMEJ TANGY» GAZETI UEZHIN LATYN AELIPBI ZHAT EMES» («Semeı tańy» gazeti úshin latyn álipbıi jat emes») dep atalady.

«Latyn álipbıine kóshýden júreksinip júrgen aǵaıynǵa aıtarymyz, tómendegi maqalany daıyndaýǵa meniń bir saǵattaı ǵana ýaqytym ketti», - dep jazǵan depýtat Rıza Moldasheva, mátinnen qatelikter tabylyp jatsa, keshirimmen qaraýǵa ótindi.

Halyq qalaýlysynyń aıtýynsha, qazaq eliniń latyn álipbıine kóshý máselesi  kópten aıtylyp kele jatqan áńgime. Al Ózbekstan, Túrikmenstan, Ázerbaıjan, Qaraqalpaqstan sııaqty birqatar túrkitildes elder birden kóz jumyp ótip ketken.

«HH ǵasyrdyń birinshi jartysynda, asharshylyq jyldary halqymyz arab álipbıinen latynǵa, soǵys jyldary latyn álipbıinen kırıllıtsaǵa kóshkenin bilemiz. Endeshe, qabiletti qazaq halqynyń búgingi urpaqtary bul álipbıdi tez-aq ıgerip ketetindigine kúmánim joq», - deıdi ol.

«...QR Prezıdenti Nursultan Ábishuly Nazarbaev «Bolashaqqa baǵdar: rýhanı jańǵyrý» atty maqalasynda: «Birinshiden, qazaq tilin birtindep latyn álipbıine kóshý jumystaryn bastaýymyz kerek. Biz bul máselege neǵurlym dáıektilik qajettigin tereń túsinip, baıyppen qarap kelemiz jáne oǵan kirisýge Táýelsizdik alǵannan beri muqııat daıyndaldyq», dep taıaý jyldaǵy eń mańyzdy mindetterdiń qatarynda latyn álipbıine kóshý máselesin atap ótti», - dep jazady avtor maqalasynda.