ShQO: Mas azamat «koronavırýs juqtyrdym» dep dárigerlerdi ábigerge salǵan
ÓSKEMEN. QazAqparat – Óskemen qalasynyń turǵyny «1406» call-ortalyǵyna habarlasyp, koronavırýs juqtyrǵanyn aıtqan. Teksere kele onyń sózi jalǵan bolyp shyqty, dep habarlaıdy QazAqparat.
Qalalyq Polıtsııa basqarmasy baspasóz qyzmetiniń málimetine súıensek, er adam 25 naýryzda táýlik boıy jumys isteıtin call-ortalyqqa qońyraý shalǵan. Ol operatorǵa jýyqta Taılandttan kelgenin, ózinde JRVI belgileri bar ekendigin aıtqan.
«Dereý jetken mamandar 39 jastaǵy turǵynnan vırýstyq ınfektsııanyń belgilerin baıqamady. Deni qulan-taza saý azamattyń ishimdik iship alǵany belgili bolǵan. Sondaı-aq tekserý kezinde óskemendiktiń shetelge shyqpaǵany anyqtaldy», - dep habarlady vedomstvo ókilderi.
Jalǵan málimet bergeni úshin er adamǵa QR ÁQBtK-niń 438-baby 1-bóligi boıynsha 30 AEK mólsherinde aıyppul salynýy múmkin.
