ShQO: Maraldy aýylynda ashylatyn kásiporynda 295 jumys orny qurylady
ÓSKEMEN. KAZINFORM - Shyǵys Qazaqstan oblysy Kúrshim aýdany Maraldy aýylynda salynady dep josparlanǵan altyn óndirýshi kásiporyn 295 adamdy jumyspen qamtı alady. Bul jóninde oblystyq Jumyspen qamtý jáne áleýmettik baǵdarlamalardy úılestirý basqarmasynyń basshysy Almıra Mýsınova aıtty.
Atalmysh eldi meken halqynyń sany – 476. Onyń 92-si zeınetker. Sondaı-aq aýylda 21 kópbalaly otbasy jáne ataýly áleýmettik kómek alatyn januıa bar.
– Dál qazir «maraldylyqtardyń kúnkóris kózi ne?» degen suraq kópshiliktiń kókeıinde júr. Munda birqatar otbasy memleket esebinen beriletin tólemdermen kúneltip otyr. Jalpy, ataýly áleýmettik kómek degenimiz otbasynyń qıyn jaǵdaıdan shyǵyp ketýi úshin beriletin kómek. Bul járdemaqy emes. Al az qamtylǵan otbasylardyń ál-aýqaty artý úshin turaqty kiris kózi bolýǵa tıis, – deıdi beıindi basqarma basshysy.
Onyń aıtýynsha, áleýmettik táýeldilik degenimiz dál osy turaqty jumystyń bolmaýynan týyndaıdy. Osy turǵydan qaraǵanda shalǵaı eldi mekende irgeli kásiporynnyń salynýy halyq úshin tıimdi bolatyny daýsyz. Maraldy halqynyń sany tórt júzdiń ústinde bolsa, altyn fabrıkasy úsh júzge jýyq jumys ornyn usynbaq. Bul aýyldaǵy árbir januıa turaqty tabys kózine qol jetkizedi degendi bildirse kerek.
Aıta keteıik, búgin jergilikti BAQ ókilderi Shyǵys óńirindegi jer qoınaýyn paıdalanýshylarǵa qatysty resmı aqparat alý úshin jaýapty organ ókilderimen kezdesý ótkizdi. Memlekettik basqarý organdary, sarapshylar men BAQ ókilderi arasyndaǵy dıalogty «Altainews medıa-ortalyǵy uıymdastyrdy.
