ShQO-lyq oqýshyǵa Túrkııa Prezıdenti syılyq jiberdi
ÓSKEMEN. QazAqparat – Shyǵys Qazaqstan oblysy Tarbaǵataı aýdanynyń 1-synyp oqýshysy Baıjigit Baıkúbenovke Túrkııa Prezıdenti Rejep Taıyp Erdoǵan syılyq jiberdi, dep habarlaıdy QazAqparat tilshisi.
Tarbaǵataı aýdany Tuǵyl aýylynda 1-synypta oqıtyn Baıjigit Abaı óleńin oqý estafetasyn Túrkııa Prezıdentine joldaǵan bolatyn.
«Ulymyz ekeýmizdi Nur-Sultan qalasyndaǵy Túrkııa Elshiligine shaqyrdy. Erdoǵan myrza syılyq jiberipti. Ózimen onlaın kezdesý de bolýy múmkin eken», – dedi balanyń ákesi Dýlat Baıkúbenov.
Onyń aıtýynsha, onlaın kezdesý 17 naýryzda ótedi. Erdoǵan myrza Abaı óleńin oqýy múmkin. Al qandaı syılyq jibergeni ázirge beımálim.
«Ulym joldaǵan estafeta týraly sol eldegi TRT AVAZ telearnasy habar taratqan edi. Erdoǵan myrza sodan kórgen bolýy múmkin. Al chellendj negizi 2019 jyly 29 qarashada joldanǵan. Arada bir jarym jyl ótse de, jaýap alǵanymyzǵa qýanyshtymyz», – dedi Dýlat Baıkúbenov.
Taǵy bir aıta keterligi, Túrkııa Elshiligi jol shyǵynyn óz tarapynan kóterip alatynyn habarlaǵan.
