ShQO-lyq áıel Tik-Tok-taǵy 20 sekýndtyq vıdeo úshin 90 saǵat kóshe sypyrady

ÓSKEMEN. QazAqparat – Shyǵys Qazaqstan oblysy Shemonaıha aýdanynyń turǵyny Tik-Tok-ta vıdeo túsirip, aýyldasynyń ar-namysyna tıgeni úshin sotqa tartyldy, dep habarlaıdy QazAqparat tilshisi.

ShQO boıynsha QAJ departamenti baspasóz qyzmetiniń málimetine súıensek, tanysymen janjaldasyp qalǵan áıel Tik-Tok áleýmettik jelisine 20 sekýndtyq vıdeo jarııalaǵan. Muny kórgen aýyldasy bul vıdeonyń onyń ar-namysy men qadir-qasıetin qorlaıtynyn aıtyp, sotqa shaǵym túsirdi.

Sot sheshimimen áıel adam 90 saǵattyq qoǵamdyq jumysqa tartyldy. 24 jastaǵy aýdan turǵyny probatsııa qyzmetiniń esebine alynyp, qoǵamdyq jumystardy atqarý úshin ákimdikke jiberildi. Endi ol kúnine tórt saǵat boıy kóshe tazalaıdy.

«Probatsııa qyzmetiniń ınspektorlary áıeldiń jumysty oryndaýyn baqylaıdy. Eger ol qoǵamdyq jumystardan jaltarǵan jaǵdaıda zań sheńberinde shara qoldanylady», - deıdi Shemonaıha aýdandyq probatsııa qyzmetiniń basshysy Gúlmıra Bólekbaeva.