ShQO qutqarýshylary zombıdiń keıpine endi
ÓSKEMEN. QazAqparat – Shyǵys Qazaqstan oblysynyń qutqarýshylary erekshe chellendj ótkizdi, dep habarlaıdy QazAqparat tilshisi.
ShQO TJD baspasóz qyzmetiniń málimetinshe, qutqarýshylar bir kúnge óz formalaryn sheship zombıdiń keıpine endi. Mundaǵy maqsat – óńirdegi jylytý maýsymynda halyqty qaýipsizdik sharalaryn saqtaýǵa shaqyrý.
«Zombı bolyp kıingen olar jer úılerdi aralap, jurtshylyqqa túsindirý jumystaryn júrgizdi. Órt shyǵý jáne ıis tııý oqıǵalaryn boldyrmaý úshin departament mamandary peshti jóndeý jáne órt qaýipsizdigi erejelerin buzý qanshalyqty qaýipti ekenin túsindirdi. «Zombı» - peshti durys paıdalanbaǵan jaǵdaıda qaýipti gazben ýlanǵannan keıingi adamnyń jaǵdaıyn beıneleıdi», - dep habarlady vedomstvo ókilderi.
Reıdti tıimdi ótkizý úshin qutqarýshylar gaz taldaǵysh quraldy qoldandy. Osy jabdyqtyń kómegimen úılerdegi ýly gaz deńgeıin tekserýge bolady.
Aıta keteıik, Shyǵys Qazaqstanda ótken jylytý maýsymynda 90 adamǵa ıis tıgen.
