ShQO qutqarýshylary jolda qalǵan dárigerlerge kómekke keldi
ÓSKEMEN. QazAqparat – Shyǵys Qazaqstan oblysy Glýbokoe aýdanynda qutqarýshylar jolda qalǵan dárigerlerge kómekke keldi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, jedel járdem qyzmetkerlerine Glýbokoe aýdany Karagýjıha aýylynda 68 jastaǵy qart kisiniń ınfarkt alǵandyǵy týraly habar tústi.
«Olar zeınetkerge medıtsınalyq kómek kórsetý úshin birden jolǵa shyqty. Alaıda aýa raıynyń qolaısyzdyǵyna baılanysty naýqasqa jete almaı, jolda qalǵan. Sol jerge oblystyq TJD qutqarýshylary shuǵyl kelip jetti. Jol talǵamaıtyn kólikpen dárigerlerdi tıisti mekenjaıǵa aparyp, qart kisini teksergennen keıin ony aýrýhanaǵa deıin jetkizip tastady», - dep habarlady vedomstvo ókilderi.
