ShQO qutqarýshylary jolda qalǵan 7 adamdy evakýatsııalady
ASTANA. QazAqparat - Apatty-qutqarý jumystary qatarynan eki aýdanda júrgizildi, dep habarlady Shyǵys Qazaqstan oblysy TJ departamenti.
Semeıdegi «Semeı-Znamenka» avtojolynda qar sýyna batqan jeńil kólik jolaýshylary kómekke muqtaj boldy. Eske sala ketsek, sý tasqynyna baılanysty «Semeı-Qaınar» trassasy barlyq kólik túrleri úshin jabylǵan edi.
Sharýa qojalyǵynan shyqqan Toyota Land Cruiser markaly avtokóligi aýyl arasyndaǵy jolda erigen qar sýyna turyp qalǵan. Kólikte bes adam bolǵan, onyń ekeýi balalar. Qutqarý bólimsheleri kelgenshe sharýa qojalyǵynyń shopany azamattarǵa kólikten túsýge kómek bergen, odan keıin ÓB-7 qyzmetkerleri jolaýshylardy Semeıge ákelip tastady.
Sol aralyqta Glýbokov aýdanynda «Shyǵys aımaqtyq aeromobıldi jedel-qutqarý jasaǵynyń» qutqarýshylary 2 adamdy omartadan evakýatsııalady. Olar omartaǵa qarda júrgish kólikterimen Úlbi ózeni arqyly jetken. Biraq, ózen muzy erip, keri qaıta almaǵan. Omby qardan jaıaý júrý de múmkin emes edi. Qutqarýshylar arnaıy TREKOL tehnıkasymen eki adamdy Óskemen qalasyna jetkizdi.
Evakýatsııalanǵandar arasynda zardap shekkender men qurban bolǵandar joq.
