ShQO qutqarýshylary jolda qalǵan 5 adamǵa kómektesti
ÓSKEMEN. QazAqparat – Shyǵys Qazaqstan oblysy Aıagóz aýdanynyń qutqarýshylary jolda qalǵan 5 adamǵa kómekke keldi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 1 qańtar kúni saǵat 22.00 shamasynda «Aıagóz-Qaraýyl» tasjolymen Aqshataý aýyldyq okrýginiń mańyndaǵy qystaýǵa bara jatqan 5 adam, onyń ishinde 3 bala jolda qalǵan. Kólikteri qarǵa batqan olar qutqarýshylarǵa habarlasyp, kómek surady.
«Oqıǵa ornyna №22 órt sóndirý bóliminiń qyzmetkerleri shuǵyl kelip jetti. Olar kólikti tazartylǵan jol ýchaskesine súırep aparyp, Aıagóz qalasyna deıin shyǵaryp saldy. Turǵyndardyń densaýlyǵyna eshqandaı zaqym kelgen joq», - delingen aqparatta.
Osy rette, oblystyq TJD mamandary óńir jurtshylyǵyna qaýipsizdik sharalaryn saqtaý qajettigin eske salady. Daýyldy eskertý jarııalanǵan kezde alys jolǵa shyǵýǵa bolmaıdy. Joldardyń jabylǵandyǵy týraly aqparatty «Dármen» mobıldi qosymshasy arqyly bilip otyrýǵa bolady.
