ShQO qutqarýshylary jańa jyl merekesi qarsańynda turǵyndarǵa eskertý jasady
Oblystyq Tótenshe jaǵdaılar departamentiniń Memlekettik órt baqylaý basqarmasynyń bastyǵy Rınat Qondybaev jańa jyldyq merekelerde órt oqıǵalarynyń sany kúrt artatynyn aıtyp, qaýipsizdik talaptaryn eske saldy.
Onyń sózinshe, órt ashyq jalyn, aqaýy bar gırlıandy jáne pırotehnıkany abaısyz qoldanýdan paıda bolady.
Qazir qystyń naǵyz qaharyna mingen kezi. Osyǵan qaraı turǵyndar da úıdegi peshterin tolyq qýatynda paıdalana bastaıdy. Osyndaı jaǵdaıda aqaýy bar peshten órt shyǵady. Sondyqtan peshtiń qatty qyzyp ketpeýin nazarda ustaý qajet. Sondaı-aq uıqyǵa jatýdan 3 saǵat buryn peshti sóndirgen jón»,-deıdi Rınat Qondybaev.
Sonymen qatar, jańa jyl túninde gırlıandylar men pırotehnıkany paıdalaný kezinde qaýipsizdik talaptaryn myqtap qadaǵalaǵan jón. Ol úshin osy ónimderdi mamandandyrylǵan arnaıy dúkenderden satyp alý kerek jáne olardy balalardyń paıdalanýyna jol bermeý kerek. Pırotehnıkany ǵımarattardan keminde 50 metr qashyqtyqta ári ashyq keńistikte iske qosý qajet. Salıýtty balkondarda nemese úılerdiń terezelerinde turyp qoldanýǵa tyıym salynady.
Sonymen qatar, 2021 jyldyń 1 qańtarynda aýa temperatýrasy -36 gradýsqa deıin tómendeıdi dep kútilýde. ShQO TJD TJ joıý basqarmasynyń bastyǵy Baýyrjan Júrekbaev aýa raıy jaǵdaıyn eskere otyryp, halyqqa qala syrtyna shyqpaýǵa keńes berdi.
«Qazir aýa-raıy turaqty, barlyq baǵyttar boıynsha jol ashyq. Soǵan qarmastan asa qajettilik bolmasa qala syrtyna shyqpaǵan jón. Sebebi kún qatty sýytýy múmkin degen boljam bar. Eger saparǵa shyǵýǵa týra kelse, jolǵa jyly kıim alyp, mobıldi qurylǵylardy tolyǵymen zarıadtap, týystaryńyzǵa baratyn jerińiz týraly eskertý kerek. Kez kelgen ýaqytta aýa temperatýrasynyń ózgerýi jáne joldardyń jaı-kúıi týraly aqparatty baqylaý úshin biz «Dármen» mobıldi qosymshasyn júkteýge keńes beremiz, onda barlyq qajetti aqparat ýaqytyly paıda bolady», - dep atap ótti Baýyrjan Júrekbaev.
Óskemen qalasynyń TJB aǵa ofıtseri Valentın Lıtvınenko ShQO turǵyndaryna ashyq muzǵa shyqqanda abaı bolý kerektigin eskertti.
«Kún sýyta bastaǵanda sý aıdyndarynda tótenshe jaǵdaılar qaýpi artady. Muzdyń qalyńdyǵy 10 santımetr bolǵanda ǵana ony adamdar úshin qaýipsiz deýge bolady, al avtomobılder úshin qalyńdyǵy 30 santımetr bolýy kerek. Muzdyń beriktigin kózben sholyp anyqtaýǵa bolady kók tústi muz berik, aq tústi muzdyń beriktigi shamamen odan 2 esege tómen. Sondaı – aq, túngi ýaqytta nashar kórinetin bolsa muzǵa shyǵýǵa bolmaıdy, - dep qorytyndylady Valentın Lıtvınenko.
Jańa jyldyq merekelerde ShQO TJD qutqarýshylary kúsheıtilgen jumys rejımine kóshirildi. Órt qaýipsizdigin 380-nen astam adam, 109 órt sóndirý tehnıkasy qamtamasyz etedi. Oblys joldarynda avarııalyq-qutqarý jumystaryn júrgizý qajet bolǵan jaǵdaıda TJ departamentiniń qaramaǵynda 155 birlik tehnıka bar. Apattar medıtsınasy qyzmeti, «Qazavıaqutqarý» AQ áýe kemesi joǵary daıyndyqta.