ShQO qutqarýshylary «Túrli halyqtardyń sálemdesýi» atty chellendj ótkizdi
ShQO tótenshe jaǵdaılar departamenti baspasóz qyzmetiniń málimetine súıensek, «Túrli halyqtardyń sálemdesýi» atty chellendj 1 mamyr – Qazaqstan halyqtarynyń birligi kúni merekesine oraı ótkizilgen.
«Departamenttiń aýdandyq jáne qalalyq bólimsheleriniń órt sóndirýshileri túrli halyqtardyń ulttyq kıimderin kıip, bir-birimen sol etnostyń dástúrine sáıkes amandasty. Chellendjdiń basty maqsaty - TJ qyzmetinde jumys isteıtin azamattardyń kópulttylyǵyn jáne birligin kórsetý», - delingen aqparatta.
Búginde oblystyq TJD qatarynda 8 ulttyń ókilderi jumys isteıdi, atap aıtqanda qazaq, orys, ýkraın, nemis, tatar, uıǵyr, ázirbaıjan jáne bolgar.
«Bul halyqtardyń árqaısysynyń ózindik erekshelikteri bolsa da olar bir otbasydaı tatý. Jyl basynan beri óńir qutqarýshylary túrli tótenshe jaǵdaılar men oqys oqıǵalarǵa 800-den astam ret bardy. Sonyń nátıjesinde 64 adam qutqarylyp, 106 adam evakýatsııalandy», - deıdi departament bastyǵynyń orynbasary Serik Amangeldın.
