ShQO qutqarýshylary pırotehnıkanyń qaýpin kórsetý úshin eksperıment jasady
ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar Jańa jyl merekesi qarsańynda eksperıment jasady. Mundaǵy maqsat – pırotehnıkany qoldanǵan kezde qaýipsizdik sharalaryn saqtamaýdyń saldaryn kórsetý.
«Eksperıment barysynda manekenniń qolyna pırotehnıka ustatyldy. Sodan keıin qaýipsizdik talaptaryna sáıkes kelmeıtin otshashý jaǵyldy. Jarylystyń kúshi nusqaýdy saqtamaýdyń qanshalyqty qaýipti ekenin kórsetti. Petardalar – janǵysh jáne totyqtyrǵysh zattardan turady. Sondyqtan ony qoldaný úshin asa abaı bolý qajettigin túsiný kerek. Pırotehnıkanyń kóbisinde sekýndyna 3-5 mıllımetr jyldamdyqpen janatyn uzyn jińishke jip bar. Qaýipti aımaqtyń radıýsy 60 metr», - dedi departament mamandary.
Sondaı-aq órt kezinde tútinnen de adamǵa kóp zaqym keledi. Osy rette, qutqarýshylar pırotehnıka qoldanǵan kezdegi qaýipsizdik sharalaryn qatań saqtaý qajettigin eskertti.
«Áýeli ónimniń sertıfıkattalǵanyna kóz jetkizińiz. Sodan keıin pırotehnıkany paıdalaný erejelerimen tanysý kerek. Qaptama bútin, jyrtylmaǵan bolýy tıis. Pırotehnıkany jaqqan kezde temeki shegýge qatań tyıym salynady. Kólikterdiń janynda otshashýdy atýǵa bolmaıdy», - delingen vedomstvo aqparatynda.
