ShQO qutqarýshylary órttiń aldyn alý úshin 60 myńnan astam úıdi aralap shyqty

ÓSKEMEN. QazAqparat – Shyǵys Qazaqstan oblysynyń qutqarýshylary órttiń aldyn alý úshin 60 myńnan astam úıdi aralap, halyqqa túsindirý jumysyn júrgizdi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, jyl basynan beri óńir aýmaǵynda 1145 órt bolǵan.

Jaǵdaıdy turaqtandyrý jáne tilsiz jaýdyń aldyn alý úshin qutqarýshylar kún saıyn jeke turǵyn úılerdi aralaýda.

«Úı ıelerine túsindirý jumystaryn júrgizip, nusqama beremiz. Eger jylytý júıesinde qandaı da bir olqylyqty kórip tursaq, turǵyndarǵa óz qaýipsizdigi úshin buzýshylyqtardy joıýdy suraımyz. Alaıda bizdiń olarǵa aıyppul salýǵa nemese peshti jóndeýge májbúrleýge quqyǵymyz joq. Sondyqtan aıtqanymyzdan nátıje shyǵarý-shyǵarmaý turǵyndardyń óz erkinde», - deıdi departamenttiń baspasóz hatshysy Marına Lıskova.

Qyrkúıek aıynan bastap qutqarýshylar azamattarǵa jylytý maýsymynda qaýipsizdik sharalaryna oraı túsindirý jumysyn júrgizý úshin 63 001 turǵyn úıdi aralap shyqty.

Onyń ishinde 8172 áleýmettik osal otbasynyń úıleri tekserildi.

Aıta keteıik, byltyrǵy jylytý maýsymynda oblysta 90 adamǵa ıis tıgen. Al bıyl ýly gazdan 3 adam zardap shekti.