ShQO qutqarýshylary kóligi muz astyna batyp ketken balyqshylarǵa kómektesti
NUR-SULTAN. QazAqparat – ShQO qutqarýshylary kóligi muz astyna batyp ketken balyqshylarǵa kómektesti, dep habarlaıdy QazAqparat ShQO Tótenshe jaǵdaılar departamentiniń baspasóz qyzmetine silteme jasap.
27 qarasha keshki saǵat 20:25-te ShQO Tótenshe jaǵdaılar departamentine kóligi Buqtyrma sý qoımasynda muz astyna batyp ketken balyqshylar týraly habar kelip tústi. Kúrshim aýdanynyń qutqarýshylary oqıǵa ornyna – qutqarý stansasynan 15 shaqyrym qashyqtyqtaǵy Alǵabas aýylyna bardy.
Túngi ýaqytta zardap shekkenderdi izdeý qıynǵa soqty. Degenmen, olardy izdeý barysynda daýys zoraıtqysh qoldanylyp, sonyń arqasynda balyqshylar tabyldy. Zardap shegýshilerdiń jaǵdaıy oıdaǵydaı bolǵandyqtan, olar evakýatsııadan bas tartty.
Sý qoımasyndaǵy muz qalyńdyǵy 5-7 sm ekeni anyqtaldy. Ol kólikti kótere almaǵan. Oqıǵa jaǵalaý mańynda bolǵan, sondyqtan kóliktiń tek bir bóligi ǵana sý astynda qalǵan.
Qutqarýshylar men jaǵadaǵy basqa balyqshylar kólikti shyǵaryp aldy. Keıin zardap shegýshiler Kúrshim aýylyna deıin jetkizildi.
«Biz qarasha aıynyń basynan beri balyq aýlaıtyn oryndardy aralap, balyq aýlaý kezindegi negizgi erejelerdi túsindirip júrmiz. Aralaıtyn aýmaq óte úlken. Kúrshim ótkeline deıingi aýmaq 36 shaqyrymdy qamtıdy. Qazirgi ýaqytta 100 adammen áńgimelestik. Qaıǵyly oqıǵalardy mysalǵa keltirip, nusqaýlyq taratyp jatyrmyz, biraq soǵan qaramastan adamdar muz aıdynyna bara beredi. Jeńil avtomobıldi qalyńdyǵy 20 sm asatyn muz qabaty ǵana kótere alady, sondyqtan kúzgi muz óte qaýipti ekenin taǵy da eske salamyz», - dedi ShQO TJD órt sóndirý qyzmeti 9-jasaǵynyń basshysy Talǵat Nurjanov.
