ShQO qutqarýshylary gıdrologııalyq jaǵdaıǵa aerovızýaldy monıtorıng júrgizdi
ÓSKEMEN. QazAqparat – Shyǵys Qazaqstan oblysynyń qutqarýshylary óńirdiń gıdrologııalyq jaǵdaıyna aerovızýaldy monıtorıng júrgizdi, dep habarlaıdy QazAqparat Shyǵys Qazaqstan oblysynyń Tótenshe jaǵdaılar departamentine silteme jasap.
Jumys toby «Óskemen – Glýbokoe aýdany – Shemonaıha aýdany - Óskemen» baǵyty boıynsha aerovızýaldy monıtorıngige «Qazavıaqutqarý» AQ-nyń «Evrokopter ES-145» tikushaǵyn qoldandy. Bul ýchaskeler óńirdiń gıdrologııalyq jaǵdaıyn anyqtaý maqsatynda tekserildi.
Monıtorıng nátıjeleri boıynsha mamandar barlyq zertteletin aýmaqta qar erýdiń bastapqy kezeńi baıqalatynyn anyqtady.
Ertis ózeninde Óskemen sý qoımasynan Glýbokoe aýdanynyń Berezovka aýylyna deıin muz joq, ózen arnasynan sýdyń shyǵýy baıqalmaıdy. Shúlbi sý qoımasynyń barlyq alańynda muz qatý baıqalady.
Sý tasqyny jaǵdaıyn baqylaý úshin óńirde 53 gıdrobeketti qamtıtyn baqylaý júıesi jumys isteıdi.
Shyǵys Qazaqstan oblysynda kóp jyldyq sınoptıkalyq boljam boıynsha oblys ózenderindegi sý tasqyny ádette naýryzdyń ekinshi onkúndiginen bastalyp, maýsym aıynyń ekinshi onkúndiginiń ortasyna deıin sozylady. Ózenderdegi sý deńgeıiniń kóterilý qarqyndylyǵy jáne kólbeý aǵyndardyń paıda bolýy aýa temperatýrasynyń kúrt kóterilýine jáne jańbyr túrindegi jaýyn-shashynǵa baılanysty artýy múmkin.
Eske sala keteıik, Shyǵys qazaqstan oblysynda qalalar men aýdandarda kóktemgi sý basýdyń aldyn alý úshin jumystar júrgizilýde. Oblys ortalyǵynda 2407 turǵyn turatyn 954 úı bar, olar sý tasqyny qaýipti aımaqta turady. Qutqarýshylar múddeli organdarmen birlesip 2021 jylǵy qysqy-kóktemgi kezeńge arnalǵan sý tasqynyna qarsy is-sharalar josparynyń oryndalý barysyna kún saıynǵy monıtorıngti júzege asyrady.
