ShQO qutqarýshylary bıyl ǵaryshtan baqylaý arqyly 658 órttiń taralýyn ýaqtyly tejedi

ÓSKEMEN. QazAqparat – Shyǵys Qazaqstan oblysynyń qutqarýshylary jyl basynan beri ǵaryshtan baqylaý arqyly 658 órtti der kezinde sóndirdi, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, óńirdiń keı aýdandarynda jyly jáne jaýynsyz aýa raıynan órt qaýpi saqtalýda. Máselen, qazirgi ýaqytta Rıdder, Altaı qalalary, Katonqaraǵaı aýdany, Kúrshim aýdany Marqakól aýylynda tabıǵı órt shyǵý qaýpi bar.

«Qyzyl jalyndy birden aýyzdyqtaý maqsatynda qutqarýshylar «Geosat» JShS-men shart jasasyp, ǵarysh monıtorıngin qoldanýda. Jyl basynan beri osyndaı baqylaýdyń kómegimen 658 termonúkte anyqtalǵan. Barlyq jerge shuǵyl attanǵan órt sóndirýshiler tilsiz jaýdyń taralýyn ýaqtyly tejep úlgerdi», - delingen aqparatta.

Aıta keteıik, adamdardyń jaýapsyzdyǵynan da óńirde órt az shyǵyp jatqan joq. Bıyl órt qaýipsizdigi talaptaryn saqtamaǵan 28 adam QR ÁQBtK-niń 410-baby boıynsha ákimshilik jaýapkershilikke tartylǵan.