ShQO qutqarýshylary balyqshylarǵa qaýipsizdik erejelerin túsindirý úshin 316 ret reıdke shyqty
ShQO Tótenshe jaǵdaılar departamenti baspasóz qyzmetiniń málimetine súıensek, qysta balyq aýlaý úshin muz ústine shyǵatyndarǵa kez kelgen sátte qaýip tónýi múmkin. Sol úshin qutqarýshylar balyqshylar jıi baratyn oryndarǵa reıdterdi jalǵastyrýda. Ondaǵy maqsat – balyqshylarǵa negizgi qaýipsizdik erejelerin túsindirý.
Qańtar aıynyń basynan beri TJD qyzmetkerleri, eriktiler jáne polıtseıler birlesip 316 ret reıdke shyǵyp, 43 nusqaýlyq ótkizip, 3105 úgit-nasıhat jadynamasyn taratty. Oblys boıynsha sý aıdyndarynda 46 eskertý jáne tyıym salý belgileri ornatylǵan.
«Balyq aýlaý áýesqoılary muzdaǵy tesikterdi bir-birine tym jaqyn qylýǵa jáne kóp adam bolyp jınalýǵa bolmaıtynyn qaperde ustaýy kerek. Árbir balyqshyda uzyndyǵy 12-15 metrge jetetin arqan bolýy tıis, onyń bir ushyna ilmek jasalady. Shańǵymen muz ústimen júrgende muzdyń beriktigin taıaqshamen tekserip, barynsha abaı bolý qajet», - delingen aqparatta.
Bir adam úshin qalyńdyǵy keminde 7-10 sm bolatyn kókshil reńkti móldir muz – ótýge qaýipsiz. Muzda toptasyp ótý kezinde bir-birinen 5-6 metr qashyqtyqty saqtaý kerek.
Muzǵa shyqqan kezde týystaryna nemese tanystaryna habarlasyp eskertip qoıǵan abzal. Sol úshin saparǵa shyǵar aldynda uıaly telefonyńyzdy tolyqtaı qýattap alyńyz.
