ShQO qutqarýshylar órttiń aldyn alý úshin 700 ret reıdke shyqty
ÓSKEMEN. QazAqparat - Shyǵys Qazaqstan oblysynyń qutqarýshylary bıyl órttiń aldyn alý úshin 700 ret reıdke shyqty, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, arnaıy qurylǵan mobıldi toptar únemi turǵyn úılerdi aralap, túsindirý jumystaryn júrgizedi.
Jyl basynan beri olar 464 564 ret aralaýǵa shyǵyp, 814 629 adam qamtylǵan. Sondaı-aq 517 jıyn jáne 706 reıd ótkizildi. Aldyn alý jumystarynyń arqasynda óńirde órt sanynyń 26%-ǵa azaıǵan. Tilsiz jaýdan kóz jumǵandar sany 29%-ǵa tómendedi.
«Rıdder qalasynda órt desantynyń qatysýymen reıd ótti. Qutqarýshylar men órt sóndirýshiler 200-den asa úıge kirip, turǵyndarǵa pesh paıdalaný erejelerin jáne jańajyldyq mereke kúnderi qaýipsizdik sharalaryn saqtaý qajettigin túsindirip, órt kezindegi is-qımyl boıynsha egjeı-tegjeıli nusqama berdi», - delingen aqparatta.
