ShQO qutqarýshylary taýda 3 ret jarylys jasady

ÓSKEMEN. KAZINFORM – Shyǵys Qazaqstan oblysyndaǵy taýda jarylys jasalyp, qar kóshkini túsirildi.

ShQO Tótenshe jaǵdaılar departamenti baspasóz qyzmetiniń málimetine súıensek, qar kóshkininiń aldyn alý úshin turaqty túrde monıtorıng júrgizilip jatyr. Sonyń nátıjesinde, Óskemen-Samar tasjolyndaǵy taý betkeılerinde qardyń kóp jınalyp qalǵany jáne jel jyldamdyǵy kóbeıse kóshkin júrý qaýpi bar ekendigi anyqtaldy.

- Soǵan baılanysty atalǵan tasjol ýchaskesinde profılaktıkalyq qar kóshkini túsirildi. Barlyǵy 3 ret jarylys jasalyp, taýdan 890 sharshy metr qar massasy tústi, - dep habarlady vedomstvo ókilderi.

Osy rette, qutqarýshylar qalyń qar jaýsa 3-5 kún ishinde, qatty jel soǵyp turǵanda jáne aıazdan keıin kún jylytyp ketkende taýly jerlerge barýdan bas tartýǵa keńes berdi. Sebebi ondaı ýaqytta qar kóshkini júrý qaýpi kúsheıe túsedi.

Eske salsaq, osyǵan deıin Almaty kóshelerinen 45 myń tekshe metr qar shyǵarylǵany habarlanǵan.