ShQO qutqarýshylary muz astyna qulap ketken jaǵdaıda ne isteý kerektigin túsindirdi

ÓSKEMEN. KAZINFORM – Shyǵys Qazaqstan oblysynyń qutqarýshylarǵa balyqshylarǵa túsindirý jumystaryn júrgizdi. 

ShQO TJD baspasóz qyzmetiniń málimetinshe, qutqarýshylar oblystyń balyq aýlaý oryndarynda reıdterdi kúsheıtti.

Olar balyqshylarǵa juqa muzǵa shyǵýdyń qaýiptiligin, ózderimen birge balyq aýlaý quraldaryn ǵana emes, qutqarý keýdeshelerin, ysqyryq pen arqan alyp júrý kerektigin eskertip jatyr. 

– Aýa raıy qubylyp turǵan kezde muz ústinde júrý qaýipti.  Ondaı kezde saqtyq sharalaryn esten shyǵarýǵa bolmaıdy. Óńir boıynsha muzdaǵy qaýipsizdik sharalaryn buzǵan 31 adam QR ÁQBtK-niń 412-baby boıynsha ákimshilik jaýapkershilikke tartyldy, - delingen aqparatta. 

Al eger muz astyna qulap ketseńiz:

– Úreılenbeńiz. Oqys qımyl jasamańyz, demińizdi turaqtandyryńyz.

– Qoldaryńyzdy eki jaqqa keńirek sozyp, deneńizge aǵys baǵytynda kóldeneń pozıtsııa berip, muzdyń shetine ilinýge tyrysyńyz.

– Keýdeńizdi muzdyń shetine aqyryn qoıyp kórińiz jáne bir aıaǵyńyzdy, sodan keıin ekinshi aıaǵyńyzdy muzǵa laqtyryńyz.

– Eger muz synbasa, baıaý jorǵalańyz nemese jaǵaǵa qaraı domalańyz.

– Qaı jaqtan keldińiz sol jaqqa qaraı jyljyńyz, óıtkeni ondaǵy muzdyń beriktigi tekserilgen.

Eske salsaq, osyǵan deıin Jetisýda joǵalǵan balyqshylar tabylǵany habarlanǵan.