ShQO qutqarýshylary halyqqa meıram kúnderi taýǵa shyqpaýdy eskertti

ÓSKEMEN. KAZINFORM – Shyǵys Qazaqstan oblysynyń qutqarýshylary óńir jurtshylyǵyna meıram kúnderi taýly jerge barmaý qajettigin eskertti.

ShQO tótenshe jaǵdaılar departamenti baspasóz qyzmetiniń málimetine súıensek, 20-25 naýryz aralyǵynda óńirdiń taýly jerlerinde qar kóshkini júrý qaýpi bar.

«Meteorologııalyq jaǵdaıdyń ózgerýine, kúnniń kúrt jylýyna jáne jeldiń kúsheıýine baılanysty oblystyń taýly jerlerinde qar kóshkini túsýi yqtımal. Osy rette, turǵyndarǵa barynsha abaı bolýdy, meıram kúnderi eshbir jaǵdaıda taýǵa shyqpaý qajettigin eskertemiz», - dep habarlady vedomstvo ókilderi.

Sondaı-aq qutqarýshylar óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldi qosymshasy arqyly tekserip otyrýǵa keńes berdi.

«Eger qandaı da bir qıyndyqqa tap bolsańyzdar birden «112» nómirine qońyraý shalyńyz»,-delingen habarlamada.