ShQO qutqarýshylary balalar lagerlerinde jıi kezdesetin zańbuzýshylyqty atady
ÓSKEMEN. KAZINFORM — Shyǵys Qazaqstanda qutqarýshylar balalardy saýyqtyrý lagerlerin tekserip jatyr. Órt qaýipsizdigi talaptary boıynsha eń kóp tirkelgen olqylyq — evakýatsııalyq shyǵý joldaryna ártúrli zattardyń qoıylýy.
ShQO Tótenshe jaǵdaılar departamentiniń málimetinshe, tekserý barysynda mamandar tótenshe jaǵdaı kezinde balalardy jedel evakýatsııalaýǵa kedergi keltirýi múmkin zattardy anyqtap jatyr.
— Lagerler ashylar aldynda olardyń órt qaýipsizdigi talaptaryna sáıkestigi tekseriledi. Árbir nysanda evakýatsııa joldaryna qoıylǵan týmbalar, ústelder, oryndyqtar jáne basqa da zattar kezdesedi. Ádette ákimshilik mundaı eskertýlerdi tekserý júrgizilgen kúni-aq joıady, — delingen aqparatta.
Qutqarýshylardyń aıtýynsha, kózge eleýsiz kórinetin mundaı kedergilerdiń ózi tótenshe jaǵdaıda sheshýshi ról atqarýy múmkin. Óıtkeni ondaı kezde ár sekýnd mańyzdy.
Bıyl óńirde 12 saýyqtyrý lageri jumys isteıdi. Aldyn ala málimet boıynsha, onda 10,6 myńnan astam oqýshy demalady.
Tekserý jumystary jalǵasyp jatyr. Onyń maqsaty — balalardy qabyldaýǵa deıin barlyq nysannyń qaýipsizdik talaptaryna tolyq sáıkes kelýin qamtamasyz etý.
Eske salsaq, buǵan deıin lager tańdaǵanda neni eskerý kerektigi jóninde jazǵan bolatynbyz.
