ShQO qutqarýshylary aıazǵa baılanysty turǵyndarǵa eskertý jasady

ÓSKEMEN. KAZINFORM – ShQO TJD mamandary aıazǵa baılanysty azamattardy qaýipsizdik sharalaryn saqtaýǵa shaqyrdy.

Oblystyq TJD memlekettik órt baqylaý basqarmasynyń bastyǵy Nurjan Ómirjanovtyń aıtýynsha, mundaı kezde úıler men páterlerde elektr jylytqyshtar men peshterde júkteme artady. Sondyqtan olardyń jumysyna nazar aýdarý kerek. 

- Peshti únemi qyzdyrmańyz, shamadan tys qyzyp ketpes úshin úzilis jasaý qajet. Balalarǵa pesh jaǵýdy senip tapsyrýǵa bolmaıdy. Jylytqyshty jelige qospas buryn sym men shtepseldi tekserý kerek. Onyń ústine zattardy keptirýge tyıym salynady, - deıdi ol.

2026 jyldyń basynan beri Shyǵys Qazaqstanda 37 órt boldy, onyń 9-y peshti paıdalaný kezinde qaýipsizdik erejelerin saqtamaýdan, 11-i elektr jabdyqtaryn paıdalaný kezindegi buzýshylyqtarǵa baılanysty, 10-y otty abaısyz paıdalanýdan shyqqan.

QR TJM Apattar medıtsınasy ortalyǵynyń dárigeri Erjan Musa aıazda ashyq aýada bolý ýaqytyn shektep, múmkindiginshe alys saparǵa shyǵýdy keıinge qaldyrý qajettigin atap ótti.

Eske salsaq, osyǵan deıin Qazaqstannyń búkil aýmaǵynda aýa raıyna baılanysty eskertý jarııalanǵany habarlanǵan.