ShQO: Kúrshimdegi kópir qurylysyna taǵy bir ınvestor qyzyǵýshylyq tanytty
ÓSKEMEN. QazAqparat - Shyǵys Qazaqstandaǵy Buqtyrma sý qoımasynyń ústinen salynatyn 1,3 shaqyrymdyq kópir qurylysyn Eýrazııa damý banki qarjylandyrýy múkin, dep habarlaıda QazAqparat tilshisi.
Oblys ákimi Danıal Ahmetov Eýrazııa damý bankniń ókilderin qabyldap, óńirdegi eki iri kópir qurylysyn qarjylandyrýǵa shaqyrdy. Onyń biri - Óskemen qalasyndaǵy Ertis ózeni arqyly ótetin kópir bolsa, ekinshisi - Kúrshim aýdanyn ózge aýdan, qalalarmen baılanystyryp turǵan porom ótkeliniń ornyna túsetin kópir.
«Sizderge eki úlken ınfraqurylymdyq jobany qarastyrýdy usynamyz. Ertis ózeni jáne Buqtyrma sý qoımasy arqyly ótetin eki kópirdiń mańyzy oblys úshin óte joǵary. Ásirese Kúrshim aýdanynda aýqymdy mys ken oryndary bar. Ókinishke oraı, atalǵan baǵytqa qaraı tranzıt máselesin sheshý múmkindigi joq. Sondyqtan aýdanda kóptegen ken oryndary áli kúnge deıin ıgerilmeı jatyr. Eger Eýrazııalyq bank jobany qolǵa alsa, Úkimet te sózsiz qoldaıtyn bolady» - dedi Danıal Ahmetov.
Kúrshim aýdanynda salynatyn kópir Buqtyrma sý qoımasy ornaǵan kezden beri ózekti bolyp kelgen kólik jáne logıstıka máselesin birjola sheshedi dep kútilýde. Al Óskemendegi kópir qurylysy kólik keptelisin joıady degen esep bar. Ákimdiktiń baspasóz qyzmetiniń habarlaýynsha, oblys ortalyǵyndaǵy kópir qurylysyna 62 mlrd teńge qajet.
«Júzege asyrýǵa múddeli jobalardy tereńirek zerdelep, bir sheshimge kelerimiz anyq. Sizdiń Ulybrıtanııaǵa jasaǵan issaparyńyzdyń qorytyndysynan habardarmyn. Eýropa qaıta qurý jáne damý bankimen birlesken jobalaryńyzǵa bizdiń taraptan da qyzyǵýshylyq baryn aıtar edim. Jalpy, bizdiń bank jobalarǵa ınvestıtsııany osy eldiń ulttyq valıýtasynda salýǵa múddeli ekenin aıryqsha atap ótkim keledi» - dedi Eýrazııa damý banki basqarmasynyń tóraǵasy Andreı Belıanınov.
Kezdesý qorytyndysynda ekijaqty seriktestik týraly memorandýmǵa qol qoıyldy.
