ShQO Kúrshim aýdanynda aýyl sharýashylyǵy ónimderiniń kólemi artty
ÓSKEMEN. QazAqparat – Shyǵys Qazaqstan oblysyndaǵy Kúrshim aýdanynda aýyl sharýashylyǵy ónimderiniń kólemi artty, dep habarlaıdy QazAqparat tilshisi.
ShQO Kúrshim aýdanynyń ákimi Almat Aqyshev «Memleket basshysynyń tapsyrmalary sheńberinde Kúrshim aýdanynyń áleýmettik-ekonomıkalyq damýy» taqyrybynda baspasóz konferentsııasyn ótkizdi. Óz sózinde ol aýdandaǵy atqarylyp jatqan jumystar jaıly baıandady.
«Aýdan boıynsha mal sany ótken jylǵy kezeńmen salystyrǵanda birshama ósti. Jylqy sany – 8,9 paıyzǵa, iri qara – 0,4 paıyzǵa, qoı men eshki – 2,2 paıyzǵa artqan. Aýyl sharýashylyǵy ónimderin óndirý kóleminde de ósim bar. Naqty aıtqanda, sút óndirý – 3 paıyzǵa, et óndirý – 3, jumyrtqa óndirý – 0,8 paıyzǵa artyp otyr. Jedel derekter boıynsha osy jylǵy egis alqaby 30 myń gektardy qurady. Onyń ishinde dándi daqyldar – 2,9 myń gektar, maıly daqyldar – 1,9 myń gektar, jem-shóp daqyldary – 22 myń gektar, kartop – 1,5 myń gektar, baqsha daqyldary – 0,8 myń gektar, kókónister – 800 gektar», - dedi Almat Aqyshev.
Onyń aıtýynsha, Kúrshimde qurylys jumystary qarqyndy júrýde. Jyl basynan beri 4036 sharshy metr turǵyn úı paıdalanýǵa berilgen.
«Qazirgi tańda aýdandaǵy jumyssyzdar sany – 468 adam. Bıyl 999 jańa jumys orny quryldy. Sonyń nátıjesinde, 467 azamat jumyspen qamtylǵan. «Kásipkerlikti damytýdyń 2021-2025 jyldarǵa arnalǵan ulttyq jobasy» sheńberinde aqyly qoǵamdyq jumystarǵa 247 adam tartyldy. Sondaı-aq «Jastar is-tájirıbesi» jobasy aıasynda 25 jas maman jumysqa ornalastyryldy», - dedi aýdan ákimi.
