ShQO qolónershilerine 3 mln teńgelik granttar beriledi
ÓSKEMEN. QazAqparat - Shyǵysqazaqstandyq qolónershilerge memlekettik baǵdarlama aıasynda 3 mln teńgelik granttar berilmek, dep habarlaıdy QazAqparat tilshisi.
Bul týraly «ShQO týrıstik qaýymdastyǵy» uıymynyń atqarýshy dırektory Serik Júnisov aıtty. Oblystyq kásipkerler palatasynyń uıymdastyrýymen ótken jıynda óńirde týrızmniń qarqyndy damýyna kedergi keltirip otyrǵan jaıttar talqylandy.
Týrıstik operatorlar men demalys bazalarynyń ıeleri bizge kelgen týrısterdiń kóbi jol azaby men jol boıyndaǵy servıstiń sapasyzdyǵyna shaǵymdanatynyn aıtty. Maman tapshylyǵy da salanyń alǵa jyljýyna kedergi ekeni sóz boldy.
Oblystyq kásipkerler palatasynyń dırektory Igor Shatskıı týrıstik bazalardyń arasyndaǵy klıentke degen kózsiz talas ta salanyń damýyna jaǵymsyz áser etip jatqanyn eskertti.
«Bizdegi demalys oryndarynyń ıeleri «jeke júrip, jol tabýǵa» qumar. Bir klıentti 10 kún boıy eshqaıda jibermeı, ózinde ustaǵysy keledi. Al birneshe kún boıy bir ǵana bazanyń aýmaǵynda otyrý týrısti jalyqtyryp jiberýi múmkin. Klıentterdi almasý tájirıbesin damytý qajet» - dedi Igor Shatskıı.
Al «ShQO týrıstik qaýymdastyǵy» uıymynyń atqarýshy dırektory Serik Júnisov eldegi týrızmdi damytýǵa arnalǵan memlekettik baǵdarlama men jańa zań jobasy jergilikti qolónershiler men qonaqjaı úılerdiń tasyn órge domalatatynyn aıtady.
«Memlekettik baǵdarlama otandyq qolónershilerge 3 mln teńgelik 1000 grant bólýi múmkin. Dál osynsha grant qonaqjaı úılerdiń ıelerine de berilmek. Oǵan qajet 3,3 trıllıon teńgeniń 2 trıllıonyn bıýdjetten tys qarjy kózderinen tartý josparlanǵan» - deıdi Serik Júnisov.
Onyń aıtýynsha, aıtylǵan jaǵymdy jańalyq týrızm týraly jańa zań jobasyna engizilgen. Ol qujat búkil respýblıka boıynsha qyrkúıek aıynyń sońyna deıin taldanady.
