ShQO: Qoqystan tabylǵan bas súıek saraptamaǵa jiberildi
Oblystyq ekologııalyq qaýipsizdik ortalyǵynyń mamandary qoqystan adam súıegin taýyp alǵan bolatyn. Eldi eleń etkizgen bul oqıǵaǵa polıtsııa qyzmetkerleri de aralasty.
«Jyldaǵy ádet boıynsha zańsyz paıda bolǵan kúltóbelerdi anyqtaý úshin reıdke shyqqanbyz. Úlbi ózeniniń adam aıaǵy baspaıtyn ańǵarynda «Kishi aınalma jol» dep atalyp ketken aýdan bar. Kózden tasa jer bolǵandyqtan, jurt qurylys qaldyqtaryn osynda ákep tógedi. Bıyl ondaǵy úıindilerdiń sany 40-qa jetipti. Álgilerdiń birinen taıaqqa shanshylǵan bas súıek taýyp aldyq. Dereý polıtsııa qyzmetkerlerin shaqyrdyq. Olar úıindini ári qaraı qoparyp, omyrtqa men qabyrǵa synyqtaryn da tapty. Bizdiń boljam boıynsha tabylǵan súıekter jer qazý kezinde shyǵý múmkin. Ony tapqan adam basy artyq sharýadan qashyp, osy jerge tógip ketse kerek», - deıdi ekologııalyq qaýipsizdik ortalyǵynyń mamany Elena Polıantseva.
Polıtsııa atalǵan oqıǵa boıynsha tekserý jumystaryn júrgizýde.
«Bizge aqparat jetken boıda jedel-izdestirý toby jiberildi. Bul oqıǵa sotqa deıingi tergep-tekserýlerdiń biryńǵaı tizilimine alyndy. Al bas súıek tıisti saraptamalardan ótkiziledi», - deıdi oblystyq ishki ister departamentiniń memlekettik til jáne aqparat basqarmasynyń mamany Azamat Raısov.