ShQO qoǵamdyq keńesi ekologııa salasyndaǵy túrli máselelerdiń sheshilýine atsalysyp otyr
Oblystyq qoǵamdyq keńes janynan túrli baǵytta qurylǵan komıtetter turaqty túrde jumys istep jatyr. Sonyń biri – ekologııa máseleleri boıynsha komıtet.
Onyń jetekshisi Gennadıı Koreshkov atalmysh taqyrypta qoǵam belsendisi retinde jıyrma jylǵa jýyq ýaqyt ter tógip keledi.
Komıtet osy jyldyń toǵyz aıynda 15 otyrys ótkizip, óńir aýmaǵyndaǵy ózekti ekologııalyq máselelerdi jetekshi ekologtarmen birlese talqylaǵan.
Aýanyń lastaný deńgeıi, aýadaǵy zııandy zattar mólsheri, turmystyq qatty qaldyqtardyń qorshaǵan ortaǵa áseri, eski kólikterdiń keltiretin zııany syndy taqyryptar otyrystarǵa ózek boldy.
Taǵy alty otyrys oblys aýdandarynda ótkizilgen. Qoǵamdyq qabyldaýǵa 24 suraq kelip túsip, barlyǵyna derlik jaýap berilip, tıisti tekserý jumystary júrgizilgen.
«Qoǵamdyq keńes dep aty aıtyp turǵandaı, biz eń aldymen quzyrly mekemelerge nemese turǵyndarǵa qajetti keńes bere alamyz. Máselen, keıde halyq keıbir máseleler boıynsha qaıda bararyn bilmeı jatady. Óskemen qalasynyń ózinde ekologııa baǵytynda jumys isteıtin 8 uıym bar. Azamattar kóshedegi aǵashtardyń kesilip jatqanyn kórse, aýanyń lastanýyna shaǵym aıtýdy kózdese, onyń qaısysyna baryp ótinish jazatynyn bile bermeıdi. Ekinshiden, ekologııa máselelerin sheshý boıynsha memlekettik organdarǵa, kásiporyndarǵa usynym bildire alamyz. Sebebi komıtet quramyna bilikti mamandar, ǵalymdar, ár túrli kásiporyn jetekshileri kiredi», - deıdi komıtet múshesi Elenıa Polıantseva.
Onyń aıtýynsha, bir kezderi halyq arasynda Óskemendegi iri kásiporyndardyń túngi ýaqytta aýany lastaıtyny týraly pikir keń tarap ketken.
Sol ýaqytta komıtet kásiporyndardyń birine túngi aýanyń lastaný deńgeıine ólshem júrgizýge qarajat bólýdi usyndy.
«Sondaı-aq ekologııa salasy boıynsha jol kartasy jasalǵan kezde bizdiń mamandar qundy pikirlerin aıtyp, óz usynystaryn bildirgen. Mysaly, qurǵaq jáne dymqyl qaldyqtardy bólek jınaý týraly usynys aıtyldy. Ókinishke qaraı, ol usynysymyz áli iske asqan joq. Bul konteınerler sanyn shekteýmen qatar, polıgondaǵy qaldyqtarmen jumys isteýdi ońtaılandyratyn edi», - deıdi Elenıa Polıantseva.
