ShQO: Katonqaraǵaı aýdanynda sý alǵan úıler sany 30-ǵa jetti
ÓSKEMEN. QazAqparat - Shyǵys Qazaqstannyń Katonqaraǵaı aýdany da 25 naýryzdan beri tasqynmen kúresýde. Búginge deıin aýdannyń birneshe eldi mekeni tasqynǵa tap bolyp, 30 úıdi sý alǵan, dep habarlaıdy QazAqparat tilshisi.
Ótken 2 táýlikte Katonqaraǵaı aýdanynyń 2 eldi mekenine sý jaıyldy. Aqsý aýylynda Bekalqa eldi mekenine aparatyn joldyń sýaǵaryn sý shaıyp, 2 úıdiń aýlasyna kirse, Barlyq aýylynda 10 úıdiń aýlasyna sý kirgen.
«Barlyq aýylyna Buqtyrma ózeniniń arnasynan asýy qaýip tóndirdi. Qazir keptelgen muz aýyldan 500 metr tómen jyljydy. ıAǵnı, tasqyn qaýpi tolyq seıildi. Al Aqsý aýylynda attas ózenniń deńgeıi jaýyn saldarynan kóterilgen bolatyn. Qazir onyń tereńdigi 162 santımetrden 130 santımetrge tústi. Búlingen úı nemese zardap shekken adam joq, jaǵdaı turaqtaldy. Sýdyń molaıýyna taý arasynda jyly lepti jel soǵýy da sebepker boldy. Aqsý aýylynda sý jyrǵan joldy aınalyp ótetin baǵyt jasadyq. Bekalqa aýylymen qatynas úzilgen joq. Búgin Barlyq aýylyndaǵy aýlasyn sý alǵan úılerdiń turǵyndarymen kezdesemiz» - deıdi aýdan ákiminiń orynbasary Janbolat Tynybekov.
