ShQO kásiporyndarynda bıyl 70-ten astam jazataıym oqıǵa boldy
ÓSKEMEN. KAZINFORM – Shyǵys Qazaqstan oblysyndaǵy kásiporyndarda jyl basynan beri 74 jazataıym oqıǵa bolyp, 94 adam zardap shekti.
Óńirde bıyl eńbek zańnamasyn buzýdyń 456 deregi anyqtaldy. Memlekettik eńbek ınspektsııasy komıteti ShQO boıynsha departameniniń ınspektorlary jalpy sany 350 tekserý júrgizip, zań talaptarynyń oryndalýyn baqylady.
- Jyl basynan beri bizge jeke jáne zańdy tulǵalardan 2 myńnan astam ótinish tústi. Olardyń basym bóligi eńbek qatynastaryna qatysty. Tekserý nátıjesinde 212 nusqama berilip, ákimshilik quqyq buzýshylyqtar boıynsha jalpy somasy 19,6 mln teńgege aıyppul salyndy, - deıdi departament basshysy Baqytbek Qızatov.
Oblys kásiporyndarynda 74 jazataıym oqıǵa tirkelip, 94 adam zardap shekken. Onyń ishinde 9 adam qaza bolyp, 46 adam aýyr jaraqat aldy.
Jazataıym oqıǵalardyń negizgi sebepteri - jumystardy uıymdastyrýdaǵy kemshilikter men eńbek qaýipsizdigi talaptarynyń buzylýy.
- Oqys oqıǵalardyń aldyn alý maqsatynda arnaıy tergep-tekserý jumystary júrgizilip, jaýapty tulǵalarǵa qatysty tıisti sharalar qabyldandy. Sondaı-aq bıyl jumyskerlerge 293,6 mln teńge kólemindegi jalaqy bereshegi tólenip, 964 adamnyń eńbek quqyqtary qorǵaldy, - deıdi Baqytbek Qızatov.
Alaıda áli kúnge deıin eki kásiporynnyń 19 jumyskerge 16,5 mln teńge jalaqy bereshegi qalyp otyr.
Eske salsaq, bıyl Pavlodarda óndiristik jaraqattan 11 adam kóz jumǵany habarlanǵan.
