ShQO kásiporyndary ekologııalyq zańnamany buzǵany úshin 200 mln teńgeden astam aıyppul tóledi
ÓSKEMEN. KAZINFORM — Shyǵys Qazaqstan oblysynda jyl basynan beri ekologııalyq zańnamany buzýdyń 42 deregi anyqtaldy.
Alty aı ishinde oblystyq Ekologııa departamentiniń mamandary 27 tekserý júrgizgen. Onyń basym bóligi jospardan tys jasaldy. Tekserý qorytyndysy boıynsha kásiporyndar men laýazymdy tulǵalarǵa jalpy somasy 207,1 mln teńge bolatyn 43 ákimshilik aıyppul salyndy.
Departament basshysynyń mindetin atqarýshy Áset Súleımenovtiń aıtýynsha, memlekettik ekologııalyq baqylaý nátıjesinde 21 nusqama berilip, osy kúnge deıin 203,8 mln teńge óndirilgen.
Inspektorlar negizgi nazardy ónerkásiptik kásiporyndarǵa aýdarǵan. Jyl basynan beri «Qaztsınk» JShS nysandarynda tórt jospardan tys tekserý júrgizilip, birqatar zańbuzý anyqtaldy.
Atap aıtqanda, shyǵaryndylardy ruqsat etilgen normadan asyrý, tazartý qurylǵylaryn paıdalaný talaptarynyń buzylýy, topyraqtyń lastanýy jáne óndiristik qaldyqtarmen jumys isteý talaptarynyń saqtalmaýy tirkelgen.
— Bizdiń mindetimiz tek jaýapkershilikke tartýmen shektelmeıdi. Ár tekserý nátıjesinde tıisti nusqama beriledi. Al kásiporyndar anyqtalǵan zańbuzýdy belgilengen merzimde joıýǵa mindetti, — dedi Áset Súleımenov.
Ekologııalyq baqylaý tek iri óndiris oryndarymen ǵana shektelgen joq. Jyl basynan beri mamandar qatty turmystyq qaldyqtar polıgondaryn, kommýnaldyq ınfraqurylym nysandaryn jáne káriz-tazartý qurylystaryn tekserdi.
Eske salsaq, osyǵan deıin Almatyda ekologııalyq talaptardy buzǵan 200 kólik anyqtalǵany habarlanǵan.
