ShQO kásipkerleri ulttyq taýarlar katalogin engizý merzimin keıinge shegerýdi suraıdy
ÓSKEMEN. KAZINFORM — Shyǵys Qazaqstan oblysynda kásipkerler ulttyq taýarlar katalogin engizý merzimin ózgertý qajettigin jetkizdi.
Jańa memlekettik esepteý bazasyn tolyqtyrý 2026 jyldyń 1 qańtarynan bastap mindetti bolmaq. Alaıda óńir kásipkerleri bul merzimge deıin daıyndalyp úlgerý múmkin emestigin aıtyp dabyl qaǵyp jatyr.
ShQO kásipkerler palatasynyń janyndaǵy saýda keńesiniń otyrysynda óndirýshiler men ımporttaýshylardyń búkil taýar assortımentin biryńǵaı bazaǵa engizý talaby talqyǵa salyndy.
Saýda kásiporyndary qaýymdastyǵynyń tóraǵasy Vladımır Berdnıktiń aıtýynsha, bıznes ókilderi berilgen ýaqytta barlyq taýardy bazaǵa júktep úlgermeıdi.
— Assortıment óte aýqymdy. Bul úshin arnaıy mamandar, ýaqyt jáne baǵdarlamalyq turǵyda qoldaý qajet. Qańtarǵa deıin bárin engizý múmkin emes. Al ulttyq taýar ıdentıfıkatory bolmasa, saýda toqtap qalady, — dedi ol.
Kásipkerler katalogqa engizilmegen kez kelgen taýar zańsyz aınalymdaǵy ónim bolyp sanalatynyn atap ótti. ıAǵnı, dúkender mundaı taýardy jetkizýshige qaıtarýǵa mindetti bolady.
— Al eger bul sút ónimderi, kókónis nemese et bolsa she? Onda ol taýarlar búlinedi. Zalaldy kim óteıdi? Bul másele áli kúnge deıin sheshilgen joq, — dedi dúkenderdiń biriniń ıesi.
Bıznes ókilderi qosymsha qıyndyq retinde kassalyq tehnıkany jańartý qajettiligin atap ótti. Ulttyq taýar ıdentıfıkatorlary júıesiniń jumys isteýi úshin olar qurylǵylaryn jańartýǵa nemese aýystyrýǵa májbúr.
— Bir kassalyq apparatty jańartý úshin 120-150 myń teńge ketedi. Shaǵyn dúkender úshin bul qomaqty shyǵyn. Eger dúkende úsh-tórt kassa bolsa, onda jaǵdaı tipten qıyndaıdy, — deıdi kásipkerler.
Otyrysqa qatysýshylardyń aıtýynsha, bul shyǵyndardyń bári bızneske júktelgen, memleket tarapynan ótelmeıdi.
ShQO kásipkerler palatasy aıtylǵan usynystardy jınaqtap, jaýapty memlekettik organdarǵa joldamaq.
Eske salsaq, osyǵan deıin ShQO-da azyq-túlik baǵasyn negizsiz kótergen 30-ǵa jýyq kásipker jaýapqa tartylǵany habarlanǵan.