ShQO kásipkerleri memlekettik satyp alýdaǵy jańa tekseristerge qatysty shaǵymdandy
ÓSKEMEN. KAZINFORM - 1 shildeden bastap Qazaqstanda memlekettik satyp alý salasynda kameraldyq baqylaýdyń jańa tetigi qoldanysqa engizildi. Shyǵys Qazaqstandaǵy aýdıtorlar oryndalǵan jumystar aktileri boıynsha 35,5 mlrd teńgege táýekelderdi anyqtady. Al óńir kásipkerleri jappaı tekserister merdigerlermen esep aıyrysýdy sozyp, nysandardy tapsyrý merzimderiniń buzylýyna ákelýi múmkin dep alańdaıdy.
Qatań baqylaý tetigin engizýge ótken jyldary oryndalmaǵan jumystar úshin tólem jasaý kezinde anyqtalǵan zańbuzýshylyqtar sebep bolǵan. Óńirde negizsiz aýdarylǵan qarajat kólemi 2024 jyly 318,6 mln teńgeni, 2025 jyly 879,9 mln teńgeni, al bıyl 69,4 mln teńgeni qurady.
Jańa erejeler qoldanysqa engizilgennen beri mamandar jalpy somasy 63 mlrd teńgeni quraıtyn 585 aktini qaraǵan. Nátıjesinde aýdıtorlar táýekelderdi anyqtap, tapsyrys berýshilerge jalpy somasy 35,5 mlrd teńgege qatysty 267 habarlama joldaǵan.
ShQO Memlekettik aýdıt departamentiniń málimetinshe, bul rásim qarjylyq esep aıyrysý kestesiniń buzylýyna sebep bolmaýǵa tıis.
- Kameraldyq baqylaý bir kúnnen bes jumys kúnine deıin sozylady. Ol oryndalǵan jumystar úshin shartta belgilengen 30 kúndik tólem merzimin uzartpaýy kerek. Sonymen qatar materıaldar ataýyndaǵy formaldy sáıkessizdikterdiń ózi zańbuzýshylyq bar ekenin bildirmeıdi. Olardyń sáıkestigin tehnıkalyq pasporttar, sertıfıkattar jáne bastapqy býhgalterlik qujattar arqyly rastaýǵa bolady, - delingen aqparatta.
Alaıda óńirdegi qurylys kompanııalarynyń tájirıbesi múlde basqasha. Qosymsha kelisý kezeńderi men qaıtalama tekserýler kásiporyndardyń qarjylyq aınalymyn tejep otyr.
- Alǵashqy tekserýdiń ózine bes kúnge deıin ýaqyt ketedi. Odan keıin eskertýlerdi túzetýge jáne qaıta tekserýden ótýge ýaqyt qajet. Sonyń saldarynan búkil protsess bir aıǵa nemese odan da uzaq merzimge sozylady. Osy ýaqyt ishinde nysandy tapsyryp qoıǵan merdiger qarajatsyz qalady. Al ol jumysshylarǵa jalaqyny ýaqytynda tóleýge, qurylys materıaldaryn jetkizýshilermen esep aıyrysýǵa jáne salyqtardy tóleýge mindetti, - deıdi qurylys kompanııalardyń ókilderi.
Daýly máselege qatysty ShQO Kásipkerler palatasy da óz ustanymyn bildirdi.
- Memleket qarajatynyń jumsalýyn baqylaý qajettigine eshkim kúmán keltirmeıdi. Alaıda baqylaý tetigi túsinikti ári obektıvti bolyp, adal kásipkerlerge qosymsha kedergi keltirmeýi mańyzdy. Eger jumystar tolyq oryndalyp, tapsyrys berýshi tarapynan qabyldanyp, tıisti qujattarmen rastalsa, merdiger tólemdi ýaqytynda alýǵa tıis, - deıdi ShQO Kásipkerler palatasy dırektorynyń orynbasary Aıjan Jáńgirhanova.
Memlekettik tapsyrys berýshiler de alańdap otyr. Óıtkeni qujattarǵa qol qoıýdyń keshigýi jyl sońyna deıin bıýdjet qarajatyn tolyq ıgermeý qaýpin týǵyzady.
Óńirdiń kásipkerler qaýymdastyǵy baqylaý tetigin jetildirýdi, tekseriletin kórsetkishterdiń naqty tizbesin bekitýdi jáne shaǵyn kólemdegi satyp alýlardy jappaı kameraldyq baqylaýdan bosatý úshin qundyq shekti belgileýdi usynyp otyr.
Eske salsaq, osyǵan deıin Túrkistan oblysynda 420-dan astam kásipker tirkeýsiz jumys istegeni habarlanǵan.
