ShQO kásipkeri týǵan aýylyna medpýnkt salyp berdi

ÓSKEMEN. QazAqparat  - Shyǵys Qazaqstannyń Kókpekti aýdanynda sharýa qojalyǵynyń ıesi týǵan aýylyna medıtsınalyq pýnkt syılap, dárigerge baspana alyp berdi, dep habarlaıdy QazAqparat tilshisi.

«Týǵan jer» baǵdarlamasyna ózindik únin qosqan «Rýstam» sharýa qojalyǵynyń jetekshisi Qaırat Dúısembaev ózi týǵan Aqoı aýylyna medıtsnıalyq pýnkt salyp berdi. Kásipker dárigerden tapshylyq kórip kelgen jerlesteriniń ótinishi boıynsha osy nysanda jumys isteýi tıis jas mamanǵa baspana da alyp bergen.  

«Qazir Aqoıda 80-nen astam adam qaldy. Toqsanynshy jyldarǵa deıin medıtsınalyq mekeme bolǵan. Keıin toqyraý jyldarynda jumysyn toqtatty da, ǵımaraty satylyp ketti. Jańa ǵımarat 4 bólmeli. Onyń qurylysyna 10 mln teńge jumsaldy. Al dárigerge bos turǵan úıdi satyp berdim», - deıdi kásipkerdiń ózi.

Jalpy Kókpekti aýdanynda «Týǵan jer» baǵdarlamasyna ún qosýshylar sany artyp keledi. Osyǵan deıin Tassaı aýylynda M.Áýezov atyndaǵy mekteptiń 1998 jylǵy túlekteri «Jastar saıabaǵyn» salyp bergen bolatyn.