ShQO qarjy basqarmasynyń bastyǵyna qatań sógis jarııalandy
Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń ShQO boıynsha departamenti memlekettik qyzmetkerlerdiń Ádep jónindegi keńesiniń otyrysyn ótkizdi. Onda memlekettik qyzmetkerlerdiń zańǵa qaıshy áreketteri talqylandy. Barlyǵy laýazymdaryn asyra paıdalanǵan.
Olardyń qatarynda Semeı qalasy ákiminiń burynǵy orynbasary Qaırat Erembesov, jer qatynastary bóliminiń jetekshisi Qudaıbergen Seıilhanov pen orynbasary Damır Rahymjanov, sáýlet jáne qala qurylysy bóliminiń jetekshisi Baqtııar Sálimov bar. Sheneýnikterdiń zańǵa qaıshy áreketteri týraly ShQO prokýrorynyń orynbasary Vıtalıı Shaber baıandady.
«Joǵaryda atalǵan basshylar ártúrli quqyqbuzýshylyqqa barǵan. Mysaly, jer qatynastary bóliminiń jetekshisi men
orynbasary QR Sý kodeksinde tikeleı tyıym salynǵan sý qorǵaý aımaǵynda janarmaı quıý beketin salýǵa jer ýchaskesin bergen. Basqa basshylar da osy tektes zańsyz áreketterdi júzege asyrǵan», -dedi Vıtalıı Shaber.
«Ádep keńesi músheleriniń sheshimimen zańsyz áreketke jol bergen Q. Seıilhanov pen D. Rahymjanovqa memlekettik organnyń qyzmetine nuqsan keltirgeni úshin laýazymdy qyzmetterin tómendetý týraly sheshim shyǵaryldy. Al eks orynbasar Q. Erembesov pen B. Sálimovke qatań sógis túrinde tártiptik jaza qoldanylatyn boldy»,-delingen Memlekettik qyzmet isteri jáne sybaılas jemqorlyqqa qarsy is-qımyl agenttiginiń ShQO boıynsha departamenti taratqan habarlamada.
Aıta keteıik, Qaırat Erembesov eki kún buryn ǵana oblystyq qarjy basqarmasynyń basshysy bolyp taǵaıyndaldy. Endi jańa basshynyń jazasyn óteý týraly sońǵy sheshimdi oblys ákimi qabyldaıdy.