ShQO: Qar qursaýynda qalǵan Kúrshimde tótenshe jaǵdaı jarııalandy
ÓSKEMEN. KAZINFORM - Shyǵys Qazaqstan oblysy Kúrshim aýdanynda qalyń qar túsip, aýyl halqy attap basa almaı qaldy. Qar qursaýynda qalǵan halyqqa kómek kórsetý úshin tikushaq jumyldyryldy.
Kesheli beri áleýmettik jelide Kúrshim aýdanyndaǵy aýyldardyń qar astynda qalǵany týraly vıdeolar tarap jatyr. Sonyń saldarynan halyqtyń qalamen, aýdan ortalyǵymen qatynasy úzilgen. ShQO ákimdiginiń málimetinshe, aýyl turǵyndary úshin azyq-túlik pen dári-dármek tikushaqpen jetkizildi.
- Kúrshim aýdanynda 7 qańtardan bastap qarly boran toqtamaı tur. Keıbir jerlerde qar qalyńdyǵy 1.8-2 metrge jetti. Maraldy jáne Tósqaıyń aýyldyq okrýgteriniń eldi mekenderine kólik qatynasynan qaldy. Qardyń túsýi normadan asyp ketýin jáne eldi mekenderge kólik qatynasynyń bolmaýyn eskere otyryp, Kúrshim aýdanynyń ákimdigi jergilikti aýqymdaǵy tabıǵı sıpattaǵy tótenshe jaǵdaı jarııalady, - delingen aqparatta.
ShQO Kólik jáne avtomobıl joldary basqarmasynyń derekteri boıynsha jol júrýdi qamtamasyz etý úshin qosymsha tehnıka jóneltildi. Qazirgi ýaqytta 24 arnaıy tehnıka jumyldyrylǵan. Alaıda boranǵa baılanysty jumys isteý qıyndyq týdyrýda.
- Sondaı-aq Kúrshim aýdanyna qajetti kómek kórsetý úshin ShQO TJ departamentiniń ótimdiligi joǵary tehnıkasy keldi. Maraldy jáne Tósqaıyń aýyldyq okrýgteri mektepteriniń oqýshylary 8 qańtardan bastap qashyqtan oqytý formatyna aýystyryldy. 16 qańtarda aýyldyq okrýgterdiń turǵyndaryna qajetti azyq-túlik pen dárilik zattardy jetkizý úshin tikushaq jiberildi. Jaǵdaı jergilikti atqarýshy organdardyń baqylaýynda, - delingen habarlamada.
