ShQO: Qar basqan aýyldaǵy júkti áıeldi qutqarýshylar aýrýhanaǵa jetkizip úlgerdi
ÓSKEMEN. KAZINFORM – Shyǵys Qazaqstan oblysy Kúrshim aýdanynda qar astynda qalǵan aýyldaǵy júkti áıeldi qutqarýshylar aman-esen aýrýhanaǵa jetkizdi.
Jergilikti aýqymdaǵy tabıǵı sıpattaǵy tótenshe jaǵdaı jarııalanǵan Kúrshim aýdanynda qar qursaýynda qalǵan aýyldardyń biri – Qaınarly. Onda múlde jol joq. Sol aýyldaǵy júkti áıeldiń tolǵaǵy kelgen. Qutqarýshylar ony shuǵyl túrde aýrýhanaǵa jetkizý úshin kómekke umtyldy.
«ShQO TJD jedel-qutqarý jasaǵynyń qyzmetkerleri jol talǵamaıtyn «Sherp» kóligimen qarda qalǵan Qaınarly aýylyna shyqty. Olar aýylǵa deıin bıiktigi 1,5 metrden asatyn qar qalyńdyǵyn eńserip, joldy qaq jaryp otyryp jetti», - dep habarlady departamenttiń baspasóz qyzmeti.
Aýylǵa taban tireý úshin 7 saǵattan astam ýaqyt ketken. Tabandylyq tanytqan qutqarýshylar 2002 jylǵy júkti áıeldi Marqakól aýylynda ornalasqan eń jaqyn aýrýhanaǵa qaýipsiz jetkizdi.
Eske salsaq, osyǵan deıin qar qursaýynda qalǵan Kúrshimde tótenshe jaǵdaı jarııalanǵany habarlanǵan.