ShQO qalalarynda «Qaýipsiz qala» júıesi engiziledi
ÓSKEMEN. QazAqparat - ShQO-da alǵashqy jartyjyldyqta «Qaýipsiz qala» júıesin engizý bastalady. Osy úshin Óskemende shamamen 4000 kamera ornatylýda, - dep habarlaıdy QazAqparat tilshisi.
Oblys ákimi Danıal Ahmetovtiń aıtýynsha, óńirde «Tsıfrlyq Shyǵys» tujyrymdamasy ázirlengen. Osy tujyrymdama aıasynda 12 ilki jobanyń jumysy bastaldy. Áýeli olardyń bári oblys ortalyǵynda synaqtan ótip, keıin oblystyń basqa qalalary men eldi mekenderine taratylmaq.
«Óskemen men Semeıde kósheni jaryqtandyrý júıesin jańǵyrtý boıynsha aýqymdy joba bastaldy. Bul elektr shyǵynyn 60 paıyzǵa tómendetedi. 25 myńnan astam sham 15 jyldyq kepildikpen aýystyrylady. Árbir turǵyn úıdiń aýlasy túnde jaryqpen qamtamasyz etiledi», - dedi oblys ákimi.
Óńirde Eýropa qaıta qurý jáne damý bankiniń ınvestıtsııasyna qoǵamdyq kólik qatynasyn biryńǵaı elektrondy bılettendirý júıesine kóshirý josparlanýda. Sol úshin Semeı men Óskemen qalaryna 150 jańa avtobýs satyp alynǵan. Elektrondy tólem júıesi osy avtobýstarǵa ornatyla bastaıdy.
«Bul júıe engizilse, kólik qatynasyndaǵy qarjy aınalymy aıqyn bolady. Mobıldi qosymsha arqyly kez kelgen turǵyn ózi kútken avtobýstyń qaı jerde júrgenin, qandaı aıaldamaǵa keletinin kórip, bilip otyrady. Jańa ómir sapasy osyndaı jeńildiktermen ólshenýi kerek» - dedi Danıal Ahmetov.
Aıta keteıik, búgin Shyǵys Qazaqstan oblysyny ákimi Danıal Ahmetov turǵyndar aldynda esep berýde.
