ShQO ınvestorlary qaı salada kásiporyndar ashady

ASTANA. KAZINFORM — Bıyl Shyǵys Qazaqstan oblysynda quny 55 mlrd teńge bolatyn 15 ınvestıtsııalyq jobany iske qosý josparlanǵan, nátıjesinde 400-den astam jańa jumys orny qurylady.

Bul týraly ShQO ákimi Nurymbet Saqtaǵanov Astanada óńirdiń áleýmettik-ekonomıkalyq damýy týraly esebinde aıtty.

— Biz oblystyń jańa ınvestıtsııalyq qurylymyn qalyptastyryp jatyrmyz. Portfelde jalpy quny trıllıon teńgeden asatyn 81 ınvestıtsııalyq joba bar. Onyń 64-i qazir belsendi júzege asyrylyp keledi. Bıyl 55 mlrd teńge kólemindegi 15 jobany iske qosý josparlanyp otyr, bul 400-den astam jańa jumys ornyn ashýǵa múmkindik beredi, — dedi oblys ákimi Ortalyq kommýnıkatsııalar qyzmetinde.

Buǵan qyrkúıek aıynda ótken «Altaı Invest» forýmy aıtarlyqtaı serpin berdi, oǵan 10 elden 300-den astam qatysýshy jınaldy. Forým qorytyndysy boıynsha 740 mlrd teńgege 40 memorandýmǵa qol qoıyldy.

Aımaqtyń ınvestıtsııalyq strategııasynda taý-ken metallýrgııa keshenin damytýǵa basa kóńil bólingen. Osy maqsatta ken oryndary men barlanǵan ózge de resýrstardy belsendi ıgerý josparlanyp otyr.

— Kezekte Tarbaǵataı aýdanynda taý-ken baıytý kombınatyn salý jobalary, sondaı-aq Ulan aýdanynda «Alataý Lıtıı» jáne Krı́da Korporeıshn kompanııalarynyń jobalaryn iske asyrý tur. Tehnogendik ádispen de shıkizat óndirý ıgerilip jatyr, bul buryn óndire almaǵan qorlardy aınalymǵa qosýǵa jáne eski qaldyq qoımalardan baǵaly metaldardy alýǵa múmkindik beredi, — dedi N. Saqtaǵanov.

Sonymen birge, Shyǵys Qazaqstan atom energetıkasy úshin jetekshi otyn jetkizýshi bolmaq: «Úlbi-TVS» kásiporny otyn jınaqtaryn óndirý boıynsha jobalyq qýatqa shyqty.

Aıta keteıik, 2025 jyly Shyǵys Qazaqstan oblysynyń ekonomıkasy turaqty oń dınamıkany kórsetip otyr.