ShQO halqynyń 80 paıyzy koronavırýsqa qarsy vaktsına saldyrdy
ÓSKEMEN. QazAqparat – Shyǵys Qazaqstan oblysy turǵyndarynyń 80,1 paıyzy koronavırýsqa qarsy vaktsınanyń birinshi komponentin alǵan, dep habarlaıdy QazAqparat tilshisi.
ShQO ákimdiginiń málimetine súıensek, 15 qazandaǵy jaǵdaı boıynsha óńir jurtshylyǵy arasynda COVID-19 ınfektsııasyna qarsy ekpeniń birinshi komponentin alǵandar úlesi – 80,1 paıyzdy qurap otyr. Al jalpy halyqtyń 66,5 paıyzy vaktsınanyń eki komponentin de saldyrǵan.
«Birinshi komponent boıynsha Aıagóz, Úrjar, Besqaraǵaı aýdandary kósh basynda tur. Onda turǵyndardyń 99,5% ekpe aldy. Al eki komponentti de saldyrý kórsetkishinde Besqaraǵaı (90,4%), Úrjar (88,2%) jáne Zaısan (87,2%) aýdandary aldyńǵa qatarda. Al eń tómengi orynda – Shemonaıha aýdany tur (53,2%)», - delingen aqparatta.
Sońǵy táýlikti Shyǵys Qazaqstanda 116 adam qaýipti dertke shaldyqqan. Búgingi tańda oblys vırýs juqtyrý kórsetkishi boıynsha «sary aımaqta» tur.
