ShQO halqy Ámire Qashaýbaevty eske aldy
ÓSKEMEN. QazAqparat - Shyǵys Qazaqstanda Ámire Qashaýbaevtyń 130 jyldyǵy toılandy, dep habarlaıdy QazAqparat 24.kz silteme jasap.
Ánshiniń týǵan jeri Aqbulaq aýylyna elimizdiń túkpir-túkpirinen óner janashyrlary jınalyp, ónerpazdyń rýhyna taǵzym etti. Halyq ánshi eskertkishine gúl shoqtaryn qoıyp, estelikter aıtty.
Qazaqtyń ánshilik ónerin álemge tanytqan Ámire Qashaýbaıulynyń ómir joly men shyǵarmashylyǵy áli de zerttelý ústinde. Al ánderi - máńgilik mura. Mereıtoıǵa oraılastyrylǵan respýblıkalyq mýzykalyq festıval aıasynda Abaı aspanynda sharyqtaǵan qundy týyndylar buǵan dálel. Dúbirli toı qazaq kúresi men at jarysqa ulasty.
«Qazaqtyń ónerin, án ónerin shetelge kim tanytty degende birinshi tek qana Ámireni aıtýymyz kerek. Qazirgi zamanda shet elderge shyǵyp, ándi aıtyp júrgen adamdar óte kóp. Biraq Ámire alǵash ret 1925 jyly shyǵyp, ekinshi oryn alyp, búkil dúnıejúzin tańdandyryp, sondaı ónerimen asqaqtandyryp, qazaqtyń mádenıetin, ónerin aspanǵa shyǵarǵan adam retinde sanalady», - deıdi Qazaqstannyń eńbegi sińgen qaıratkeri Jarqyn Shákárim.
