ShQO halqynyń 11%-y áli MÁMS júıesinde saqtandyrylmaǵan

ÓSKEMEN. KAZINFORM — Shyǵys Qazaqstan oblysynda MÁMS júıesinde saqtandyrylmaǵan turǵyndardyń úlesi 11%-dy qurap otyr.

QR Prezıdenti qol qoıǵan «Mindetti áleýmettik medıtsınalyq saqtandyrý týraly» zańǵa engizilgen jańa ózgeristerdi «Áleýmettik medıtsınalyq saqtandyrý qory» KEAQ-tyń ShQO fılıaly dırektorynyń orynbasary Irına Stepanova túsindirip berdi.

Onyń aıtýynsha, búginde Shyǵys Qazaqstandaǵy saqtandyrylmaǵandar sany — 80 026 adam. Bul oblys halqynyń 11%-yna teń. Sońǵy bir jyl ishinde olardyń sany 25%-ǵa azaıǵan.

— Negizgi ózgeristerdiń biri — jergilikti atqarýshy organdardyń rólin kúsheıtý. Endi ál-aýqaty daǵdarysty (D) jáne shuǵyl deńgeıdegi (E) azamattar, resmı tirkelgen jumyssyzdar úshin MÁMS jarnalary jergilikti bıýdjet esebinen tólenedi. Bul áleýmettik osal toptardyń medıtsınalyq kómekti paıdalaný múmkindigin arttyrady jáne ákimdikterdiń halyqty jumyspen qamtý máselesindegi jaýapkershiligin kúsheıtedi, — deıdi Irına Stepanova.

Taǵy bir mańyzdy jańalyq — jeńildik kezeńiniń uzartylýy. Bes jyldan kem emes merzim boıy jarna tólep kelgen azamattar tólemderdi ýaqytsha toqtatqan jaǵdaıda alty aı boıy saqtandyrylǵan mártebesin saqtaı alady. Bul ásirese jumyssyz qalǵan nemese tabysynan aıyrylǵan azamattar úshin ózekti.

Memleket 15 áleýmettik sanatqa kiretin azamattar úshin MÁMS jarnalaryn tóleýdi jalǵastyra beredi, sonyń ishinde balalar, zeınetkerler, júkti áıelder jáne múgedektigi bar adamdar.

Eske salsaq, osyǵan deıin Túrkistan oblysynda 287 myńnan astam adam MÁMS aıasynda saqtandyrylmaǵany habarlanǵan.