ShQO: «Halıfa Altaı» meshitinde «Islam mádenıeti ulttyq dástúr» atty mýzeı ashyldy
Munda sonaý saq, ǵun, túrki dáýirilerinen, ıslam tarıhy men qazaq halqynyń mádenıetinen syr shertetin biregeı qundy jádigerler qoıylǵan. Bul joba Shyǵys Qazaqstan oblysy ákimi Danıal Ahmetovtiń qoldaýymen az ýaqyttyń ishinde ashyldy.
Murajaıda Kúltegin eskertkishiniń kóshirmesi, Túrkistandaǵy áıgili Taıqazannyń kóshirmesi, qazaqtyń alty qanat kıiz úıi qoıylyp, Arystanbab, Qoja Ahmet Iassaýı keseneleriniń shaǵyn maketteri ornatyldy. Budan bólek munda kelýshiler qasıetti Quran kitabynyń elektrondy zamanýı kóshirmesin, tarıhı qundy eńbekterdiń elektrondy nusqalaryn da tamashalaı alady. Sondaı-aq munda ulttyq kóne jádigerler men
ejelgi dinı buıymdarda qoıylǵan. Tipti murajaıda túrki dáýiriniń tarıhynan syr shertetin «Oǵyznama» sekildi keıbir sırek kitaptardyń túpnusqalyq kóshirmesi de Ulybrıtanııanyń Kembrıdj ýnıversıtetinen jáne Túrkııadaǵy Súleımanıe meshitiniń kitaphanalarynan alynyp qoıyldy.
– Bul ıgi is «Rýhanı jańǵyrý» baǵdarlamasynyń aıasynda júzege asyryldy. Meshit tek dinı qulshylyq etetin orny ǵana emes, sondaı-aq salt-dástúrdi, tarıhymyzdy nasıhattaıtyn rýhanı ortalyqqa aınalýy tıis. Qazirgi zaman talaby da osy. Erte saq, ǵun, túrki dáýirlerinen bastap, Táýelsiz Qazaqstannyń qurylýyna deıingi tarıhty tizbekteıtin osynaý biregeı murajaıda qundy jádigerler men olardyń túpnusqasynan alynǵan kóshirmeleri erekshe kóz tartady. Aldaǵy ýaqytta munda Shyǵys Qazaqstannyń biregeı baılyǵy sanalatyn Eleke sazynan tabylǵan Altyn adamǵa, Qońyr áýlıege, Yrǵyzbaı áýlıege, Elbasymyz Nursultan Ábishuly Nazarbaevqa jáne Muztaýǵa arnalǵan jeke stendter ashylsa murajaı tipten árlene túser edi. Budan bólek kireberis zaldyń bir qabyrǵasyna túgeldeı derlik Qazaqstannyń damý tarıhyn sýretteıtin panoramalyq sýret salý kerek, – dedi Danıal Kenjetaıuly.
Aldaǵy ýaqytta atalmysh mýzeıdiń tynys-tirshiliginen habar beretin saıt iske qosylyp, onda mýzeıge 3D týr jasaý múmkindigi ashylady.
